Bu gün Bakı 2015 Avropa Oyunları ştata daxil edilən 1000-ci əməkdaşının işə götürülməsini qeyd edib. SİA-nın məlumatına görə, azərbaycanlı xanım Aysel Axundova Oyunlar Akademiyasının Məzun Proqramının üzvü kimi Mətbuat Əməliyyatları komandasına qoşulub.
Bakı 2015 Avropa Oyunlarının Baş icraçı direktoru və Azərbaycan Respublikasının gənclər və idman naziri Azad Rəhimov bununla bağlı fikirlərini bildirib: "Bu, Bakı 2015 komandasının davamlı artımında əlamətdar mərhələdir və mən birinci Avropa Oyunlarına doğru gedən yola qoşulduğu üçün Ayseli salamlamaq istərdim.
Böyük bir komandanın qurulması üçün yüksək səviyyəli təcrübəyə malik beynəlxalq işçi heyətimiz və mükəmməl yerli biliklərə sahib azərbaycanlı əməkdaşlar bir araya gəlib.
Əminəm ki, komandamızın malik olduğu bilik və təcrübə Azərbaycanın və Avropanın fəxr edəcəyi möhtəşəm yarışların keçirilməsini təmin edəcək".
Bu yaxınlarda Bakı Dövlət Universitetinin hüquq fakültəsinin məzunu olmuş A. Axundova Azərbaycanda daha öncə keçirilmiş əsas yarışlarda, o cümlədən, FİFA U-17 qadınlararası dünya çempionatında və 2012-ci il Avroviziya mahnı müsabiqəsində iş təcrübəsinə malikdir.
21 yaşlı A. Axundova da fikirlərini bildirib: "Mən "Bakı 2015" komandasına qoşulduğum üçün fəxr edirəm və birinci Avropa Oyunları istiqamətində gedən işlərdə öz töhfəmi verməyi səbirsizliklə gözləyirəm.
Bu tarixi idman yarışında rol almaq gözəl imkandır və mən Bakı 2015 Avropa Oyunlarının reallaşmasına köməklik göstərəcəyimə ümid edirəm".
Hazırda "Bakı 2015" komandasında Azərbaycan da daxil olmaqla, dünyanın 43 ölkəsindən olan işçilər 18 şöbədə çalışırlar.
Bakı 2015 Avropa Oyunları Əməliyyat Komitəsinin Əməliyyatlar üzrə baş direktoru Saymon Kleq isə belə deyib: "Bakı 2015" komandasının üzvlərinin sayı hər həftə artmaqda davam edir və mən yüksək səviyyəli peşəkarlardan ibarət belə bir keyfiyyətli komanda topladığımız üçün çox məmnunam.
Xarici və yerli işçilərin vəhdəti Avropanın istedadlı idmançıları üçün mümkün olan ən yaxşı yarışları keçirməkdə dinamik və əyləncəli mühit yaradıb".
Bütün xəbərlər Facebook səhifəmizdə
USD
EUR
GBP
RUB