Bu il güləşçilərimiz vətənə 229 medal gətiriblər

10 İyul 2014 11:49 | 562

Azərbaycan güləşçiləri 2014-cü ilin ilk 6 ayı ərzində beynəlxalq yarışlarda 229 medal qazanıblar.

Azərbaycan Güləş Federasiyasının (AGF) mətbuat xidmətindən SİA-ya verilən xəbərə görə, 2014-cü il yanvarın 1-dən iyul ayının 1-nə qədər olan müddətdə güləşçilərimiz keçirilən beynəlxalq turnirlərdə ümumilikdə 229 medal qazanıblar. Bunların 47-si böyüklərdən, qalanı isə gənc və yeniyetmələrdən ibarət komandalarımızın payına düşür.

Qazanılan medalların 80-i qızıl, 59-u gümüş, 90-ı isə bürünc medallardır. Qarşıda ilin hələ 6 ayının olduğunu da nəzərə alsaq, orta hesablamalara görə, idmançılarımızın qazanacaqları mümkün medalların sayı ötənilki göstəriciləri geridə qoyacağı gözlənilir.

Qeyd edək ki, 2013-cü ilin yekunlarına əsasən, iştirak etdikləri rəsmi beynəlxalq yarışlarda güləşçilərimiz ümumilikdə 92 qızıl, 71 gümüş və 135 bürünc medal qazanmışdılar.

2014-cü ilin ilk 6 ayı ərzində Azərbaycan güləşçilərinin beynəlxalq turnirlərdə və Avropa çempionatlarında qazandığı nəticələr:

	Sərbəst			Yunan-Roma			Qadın			Ümumi
	*Qızıl*	*Gümüş*	*Bürünc*	*Qızıl*	*Gümüş*	*Bürünc*	*Qızıl*	*Gümüş*	*Bürünc*	Ümumi
Yeniyetmələr	18	15	22	10	9	20	5	2	1	102
Gənclər	6	8	13	13	6	11	7	9	7	80
Böyüklər	13	5	5	2	3	7	6	2	4	47
	37	28	40	25	18	38	18	13	12	229
	105			81			43			229