Topaz Premyer Liqasının 28-ci turuna "İnter"-"Rəvan" oyunu ilə yekun vurulub. Siasport.az saytının məlumatına görə, rəqibini 3:0 hesabı ilə məğlub edən "İnter" avrokuboklar uğrunda mübarizəsini davam etdirir.
Xatırladaq ki, bazar günü keçirilməli olan oyun əlverişsiz hava şəraiti ilə əlaqədar olaraq yarımçıq dayandırılmış və oyunun bazar ertəsi keçirilməsinə qərar verilmişdi.
Baş məşqçilərin fikirlərini nəzərinizə çatdırırıq:
Güvenc Kurtar, "Rəvan" klubunun baş məşqçisi: "İnter"i qələbə münasibəti ilə təbrik edirəm. Çox yaxşı oynadılar. Bu oyunu "Neftçi" ilə matçdan öncə sınaq kimi çalışdıq. Rəqibin iki cinah futbolçusu "Neftçi"də olduğu kimi hücum zamanı meydana daxil olur. Onların qarşısını ala bilmədik. Qapı dirəyindən dönən topumuz var idi. İkinci qolu buraxdıqdan sonra isə işimiz daha çətin oldu. Bütün gücümüzü kuboka yönəldəcəyik. Bundan sonrakı oyunlarda qələbə qazanmaq istəyirik. Kubokdan öncə "Sumqayıt" və "Qarabağ"la oyunumuz var. Çatışmazlıqları aradan qaldırmağa çalışacağıq. "Sumqayıt"ın son oyununu izlədim, əvvəlkindən çox fərqlənir. Hakimlərə təşəkkür edirəm, oyunu yaxşı idarə etdilər".
Kaxaber Sxadadze, "İnter" klubunun baş məşqçisi: "Qəbələdə vacib qələbədən sonra gözəl oyunla 3 xalı qazandıq. Komandamı təbrik edirəm. Bugünkü oyun da vacib idi. Öncəki turdakı uğuru möhkəmlətməli idik. Bu cür oyuna psixoloji hazırlaşmaq çətin idi. Rəqib psixoloji cəhətdən daha sərbəst idi. Qol vurmağımıza baxmayaraq, bəzi futbolçularda həyacan var idi. Fasilədə komanda ilə danışdıq, futbolçular özlərini ələ aldılar və ikinci hissəni böyük üstünlüklə başa vurdular. Avrokuboklar uğrunda mübarizədə psixoloji cəhətdən daha dözümlü olan komandalar mükafatçılar sırasına düşəcək. PFL-ə oyunu təxirə saldığı üçün təşəkkürümü bildirirəm. Dünənki şərtlərdə oyun heç bir komandanın xeyrinə getməzdi. Bu gün isə daha yaxşı hava şəraitində oynadıq, hər iki komanda baxımlı oyun göstərdi. 7-8 futbolçumuz sarı vərəqə limitində idi. İstənilən futbolçu lazımsız vərəqə alarsa, cəzalanacaq".
Bütün xəbərlər Facebook səhifəmizdə
USD
EUR
GBP
RUB