Topaz Premyer Liqasının 24-cü turunda Lənkərana səfər edən "İnter" yerli "Xəzər Lənkəran"la oyunda heç-heçə ilə kifayətlənib – 1:1. Siasport.az saytı baş məşqçilərin fikirlərini nəzərinizə çatdırır:
Kaxaber Sxadadze, "İnter" klubunun baş məşqçisi: "Xəzər Lənkəran"a qarşı keçirdiyimiz bugünkü oyun da həmişəki kimi çox maraqlı alındı. Çox gərgin mübarizə getdi. Yaxşı təsir bağışladıq, amma vurulmuş qoldan sonra bir qədər müdafiəyə oturduq və həmin 12 dəqiqə bizə yaxşı bir şey vermədi. Bu 12 dəqiqə ərzində qol buraxdıq və "Xəzər Lənkəran" hesabı bərabərləşdirdi. Ümumiyyətlə, rəqibin fiziki futbola üstünlük verdiyini, uzun toplarla və yaxud da uzaqdan endirilmiş zərbələrlə uğur qazanmaq istədiyini bilirdik. Müdafiədəni yaxşı qurduq. Ümumiyyətlə, yaxşı təsir bağışladıq. Əfsuslar olsun ki, oyun heç-heçə başa çatdı. Fasilədən sonra "Xəzər Lənkəran" komandasının futbolçuları yorulmuşdular və boşluqlar yaranmağa başladı. Biz bunu bilirdik, lakin əlimizə düşən şanslardan istifadə edə bilmədik. Son oyunlarda heç-heçə seriyası ilə üz-üzə gəlmişik. Hər oyun demək olar ki, heç-heçə başa çatır. Mükafatçılar sırasına düşmək və avrokuboklara vəsiqə qazanmaq istəyirik".
Mustafa Dənizli, "Xəzər Lənkəran" klubunun baş məşqçisi: "Mükəmməl bir seriyadan sonra bərabərlik seriyası başladı. İnşallah bu itirilmiş xalları qarşıdakı oyunlarda qazanarıq. Turnir cədvəlində yuxarı pillələrə qalxmaq istəyirik. Bura gəldiyim gün vəziyyətimiz bu liqaya yaraşmayan halda idi. Davamlı olaraq irəliləmək istəyirik. Keçən həftə səhvimiz ucbatından 2 xal itirdik. Qarşıdakı oyunlarda itirdiyimiz xalları bərpa etmək lazımdır. Həm kubokda, həm də liqada uğur qazanamağa çalışacağıq".
Bütün xəbərlər Facebook səhifəmizdə
USD
EUR
GBP
RUB