Azərbaycanın üç və İranın iki mütəxəssisi qadın idman gimnastikası üzrə beynəlxalq dərəcəli hakim olub. Siasport.az saytının məlumatına görə, həmin qərar Beynəlxalq Gimnastika Federasiyasınını (FIG) Qadın idman gimnastikası üzrə Texniki Komitəsinin prezidenti Nelli Kimin iştirakı ilə yanvar ayının sonunda Bakıda keçirilən hakimlər üçün seminarın yekunlarına əsasən qəbul edilib.
Qadın idman gimnastikasına dair kurslarda uğurla iştirak edən milli məşqçilərimiz Səbinə Bəşirova ("Sərhədçi"), Lalə Abdullayeva ("Neftçi"), habelə Rza Əliyev (Bakı İdman məktəbi) iki imtahan verərək 4-cü hakimlik dərəcəsi alıblar. L.Abdullayeva və R.Əliyev həm də akrobatika və kişi idman gimnastikası üzrə müvafiq olaraq 4-cü və 2-ci dərəcəli hakimlərdir.
Kursların rəhbəri bildirib ki, R.Əliyev qadın gimnastikasında yalnız qadınların hakimlik edə biləcəyi barədə stereotipləri dağıdıb. FİG Texniki Komitəsinin başçısı deyib: "Üstəlik, bir olimpiya siklində eyni adamın həm kişilərin, həm də qadınların yarışına hakimlik etməsini xatırlamıram".
Yeni hakimlər artıq mart və aprel aylarında Almaniya və Qətər, Sloveniya və Xorvatiyada keçiriləcək Dünya Kubokunun "B" kateqoriyalı mərhələ yarışlarında iştirak edə biləcəklər. Mayın ortalarında isə Sofiya şəhərində Avropa çempionatı keçiriləcək.
Qeyd edək ki, Azərbaycan Gimnastika Federasiyası ötən ildən başlayaraq qadın idman gimnastikasını fəal inkişaf etdirir.
Bütün xəbərlər Facebook səhifəmizdə
USD
EUR
GBP
RUB