Karate üzrə Azərbaycan milli komandası İndoneziyada keçirilən III İslam Həmrəyliyi Oyunlarında çıxışlarını uğurla başa vuraraq bu gün vətənə qayıdıb. 3 qızıl və 2 gümüş medal qazanan karateçilərimizin komanda yarışlarında möhtəşəm qələbəsi, zala toplaşan bütün azarkeşlərin rəğbətinə səbəb olub. İdmançılarımızın uğurlarında yığma komandanın baş məşqçisi, federasiyanın vitse-prezidenti Rəhman Hətəmovun əməyi də xüsusi qeyd edilməlidir. Hər bir yetirməsi ilə birgə gərgin anlar yaşayan, döyüşdən öncə taktikanı müəyyənləşdirən məşqçi ilə karate yarışları başa çatdıqdan sonra söhbətləşdik. Siasport.az saytı baş məşqçinin müsahibəsini nəzərinizə çatdırır:
- Rəhman müəllim, komandanın bu nəticəsini gözləyirdinizmi?
- Rəqiblərimizin bir çoxu adlı-sanlı karateçilərdən ibarət komandası olan, karatedə dominantlıq edən ölkələr sayılır. Lakin mən bütün idmançılarımızdan medal gözləyirdim. Rəfael Ağayevin qələbəsinə şübhəm yox idi və o, yenə ən güclü olduğunu sübut etdi. Ayxan Mamayevlə Şahin Atamov isə öz əzmkarlıqları ilə məni xüsusilə sevindirdilər. Niyazi isə uzun müddətdir zədədən sonra ilk dəfə idi belə böyük yarışa çıxırdı. Buna baxmayaraq, bütün kollektiv etimadı doğrultdu və sevindirici haldır ki, 5 çəki dərəcəsindən 4-nün finalında Azərbaycan karateçiləri döyüşdülər. Bu, böyük uğurdur.
- Komanda yarışının final döyüşü daha maraqlı oldu.
- Bəli. Karateçilərimiz fərdi olaraq həmişə uğur qazansalar da, ilk dəfə idi ki, belə böyük turnirin komanda döyüşlərində birinci olduq. İslam ölkələrinin baş yarışında qalib olmaq qürurvericidir. Xüsusən də finalda İran kimi güclü komandaya qalib gəlmək. Onlar həm atletik, həm də çəkilərinə görə bizim idmançılardan böyük idilər. Buna baxmayaraq, karateçilərimizin əzmkarlığı qarşısında İran idmançıları da dayana bilmədilər. Milli Olimpiya Komitəsinin vitse-prezidenti Çingiz Hüseynzadə və gənclər və idman nazirinin müavni İsmayıl İsmayılovun döyüşlərimizi tribunadan izləməsi də idmançılarımızda böyük ruh yüksəkliyi yaratdı.
- Əgər zədə problemi olmazsa, hazırkı heyət birlikdə neçə il döyüşə bilər?
- Hazırda komandanmızın ən gənc üzvünün 21, ən yaşlısının - Rəfaelin isə 28 yaşı var. Karatedə maksimum 35 yaşadək döyüşmək olar. Əgər zədə problemi olmazsa, bu komanda azı 5 il Azərbaycanın şərəfini layiqincə qoruya biləcək. Təki zədə olmasın. Məsələn, mən 18 yaşımda Azərbaycanın ilk dünya çempionu olsam da, zədə səbəbindən karyeramı çox tez bitirməli olmuşam.
- Hazırda Azərbaycanın karate yığması dünyanın ən güclülərindən sayılır. Bəs yığma üzvlərini əvəz edəcək ehtiyat qüvvə varmı?
- Bu gün bizim perspektivli ehtiyat qüvvəmiz, gənclərimiz var. Onlar da indiki nəsli tədricən layiqincə əvəz edəcəklər. Komandamızda nəsil dəyişikliyi tədricən gedir. Heyət birdən-birə yenilənmir. Ona görə də heyət hec zaman zəifləmir.
Bizim güclü karate məktəbimiz olub. Bu məktəbin başında isə Ülvi Quliyev, Füzuli Musayev, Yaşar Bəşirov, Əhməd Hətəmov kimi güclü karateçilərimiz dayanıblar. Bu gün gənclərimiz onları layiqincə əvəz edə bilirlər.
Bütün xəbərlər Facebook səhifəmizdə
USD
EUR
GBP
RUB