Siasport.az saytı "İnter"in prezidenti Georgi Nikolovun müsahibəsini təqdim edir:
- Bu ili "İnter" üçün necə qiymətləndirirsiz?
- Birmənalı qiymət vermək olmaz. İli turnir cədvəlinin birinci pilləsində başa vurmağımız sevindirir. Lakin digər tərəfdən bizim Avropa Liqasında daha yaxşı çıxış etmək imkanımız olsa da, qrup mərhələsinə vəsiqə qazana bilmədik. Hər şeyə rəğmən, "İnter"in öz yolu var və biz bu yolla irəliləyirik. Bizim üçün əsas nəticədi.
- Qışda komandada ciddi dəyişiklər gözlənilir?
- İki futbolçu komandanı tərk edib. Bunlar Arafat və Barmettlerdi. "İnter"dən başqa heç kim getməyəcək. Çünki onsuz da geniş oyunçu seçimimiz yoxdu. Bir neçə yeni futbolçu almağı planlaşdırırıq. Bunlar da əsasən legionerlər olacaq. Çünki yaxşı yerli futbolçuların hamısının müqaviləsi var. İki hücumçu almaq istərdik.
- AFFA-da keçirilən son toplantıda siz reqlamenti dəyişməyi təklif etmişdiniz...
- Mən dörd dövrədən ibarət 10 komandalı çempionata qarşıyam. Onda Bakı çempionatı alınacaq. Regionlardan yalnız "Qəbələ" və "Xəzər Lənkəran" qalacaq. Mən istərdim ki, 12 komanda qalsın və onlar 3 və ya 4 dörvədən ibarət çempionatda iştirak etsinlər. Avropadakı təzyiqə hazır olmağımız lazımdı.
- Bildiyimiz qədərilə siz xaricdən hakim gətirilməsini də istəyirsiz...
- Mən bizim hakimlərin əleyhinə deyiləm və onları zəif saymıram. Əksinə, onların arasında yaxşı peşəkarlar var və öz işlərini yaxşı bilirlər. Sadəcə, bəzi səhvlər onlara olan inamı azaldır. Amma əcnəbi hakimlərin dəvət olunmasına da qarşı deyiləm. Fikrimcə, bu, bizi bəzi problemlərdən xilas edə bilər.
- Sizcə, indi hansı azərbaycanlı futbolçular xaricdə çıxış edə bilərlər?
- Kamran Ağayev. Hansı ki, indi onsuz da komandasızdı. Ruslan Abışov özünü Türkiyədə yaxşı tərəfdən göstərə bilər. Cavid İmamverdiyev də yaxşıdı. Amma o, bir il də Azərbaycanda özünü göstərsin, sonra legioner həyatı barədə düşünər. Sonra bizim Nizami Hacıyev. Son dövrlər "Simurq"da Murad Səttarlı ilə Rasim Ramaldanov da yeni səviyyəyə qalxıblar.
- "İnter" rəhbərliyi Kaxaber Tsxadadzedən razıdı?
- Bəli. O, yaxşı kollektiv yaradıb. Bu, məhz bizim istədiyimiz şeydi. Bizim onunla müqaviləmiz mövsümün sonunda başa çatır. Amma mən onunla yenidən danışmaq və yeni müqavilə bağlamaq istəyirəm.
- Bu mövsüm bir Azərbaycan klubu Avropa Liqasının qrup mərhələsində çıxış etdi. Sizcə, Çempionlar Liqasının qrupunda düşmək nə dərəcədə realdı?
- ÇL tamamilə fərqli turnirdi. Amma möcüzəyə imza atmağın vaxtıdı. BATE bir dəfə bu turnirə vəsiqə qazandı, təcrübə topladı, indi ordan çıxmır. Çox istərdim ki, "İnter"i də ÇL-də görüm. Amma reallıq belədi ki, biz hələlik sadəcə Avroliqa barədə düşünə bilərik. Bu turnirdə hətta pley-off barədə də düşünmək olar.
- Lakin "Neftçi"də belə hesab edirlər ki, onların uğurunu yaxın beş ildə heç bir Azərbaycan klubu təkrarlaya bilməyəcək...
- Mən belə hesab etmirəm. Bəli, "Neftçi" öz uğuru ilə bizim hamımızı sevindirdi. Amma bir qədər ciddi olmaq lazımdı. Axı "Qarabağ" da əvvəlki mövsümlərdə buna çox yaxın idi.
- Sizcə, 2012-ci ilin ən yaxşı futbolçusu və məşqçisi kimi kimləri qeyd etmək olar?
- Ən yaxşı futbolçu Ruslan Abışovdu. O, "Xəzər Lənkəran"a keçəndən sonra da yaxşı oyun sərgiləyir. Yığmada da üzdə olan futbolçulardan idi. Ən yaxşı məşqçi Böyükağa Hacıyev oldu. Kaxaber Tsxadadze isə onunla bir-ikinci yerləri bölüşür.
Azerisport.az
Bütün xəbərlər Facebook səhifəmizdə
USD
EUR
GBP
RUB