Azərbaycan Premyer Liqasının II turunun AZAL-la oyununda əldə olunan böyük hesablı qələbə "Xəzər Lənkəran" üçün bır sıra maraqlı faktlarla əlamətdar olub. Siasport.az saytı xəbər verir ki. bu 3:0 hesablı qələbə həm cari, həm tarixi baxımdan əhəmiyyət kəsb edib.
Komanda cari mövsümdə çıxdığı 4-cü oyunda (2-i Avroliqa, 2-i Premyer Liqa) 1-ci dəfə böyük hesablı qələbə qazanıb.
"Xəzər Lənkəran" sonuncu belə qələbəsini ötən mövsüm, aprelin 23-də qazanmışdı. İndi olduğu kimi, həmin vaxt da rəqib AZAL idi. 113 gün əvvəl də komanda 3 cavabsız qol vursa da həmin vaxt öz meydanında qalib gəlmişdi. Bu 2 matç AZAL-la rəqabət dövründə qeydə alınan 2 böyük hesablı nəticədir.
Yeri gəlmişkən, bu, baş məşqçi Mirça Rednikin bu postda 3-cü böyük hesablı qələbəsidir. İki dəfə AZAL-ı məğlub edən Rednikli "Xəzər Lənkəran" MOİK-ə də eyni – 3:0 hesabı ilə qalib gəlmişdi.
Rednikli ilk 2 fərqli qələbə öz meydanında qazanılmışdısa, rumıniyalı ilk dəfə səfər darmadağınına sevindi. Komanda sonuncu dəfə rəqib meydanında 2009-cü il noyabrın 29-da coşmuşdu. 623 gün öncə "Bakı" ilə səfər oyununda 3:0-a sevinmişdi.
Premyer Liqada çıxış etdiyi 2004/05 mövsümündən bəri "Xəzər Lənkəran" hər çempionatda böyük hesablı qələbə qazanıb. Ümumilikdə isə belə qələbələrin sayı artıq 32-yə çatıb:
2004/05 – 8
2005/06 – 1
2006/07 – 6
2007/08 – 5
2008/09 – 5
2009/10 - 4
2010/11 – 2
2011/12 - 1
Cəmi - 32
Ölkə çempionatı ilə yanaşı, Azərbaycan kubokunda da böyük hesablı qələbələr olub. Bu yarışda 10 dəfə "Xəzər Lənkəran" rəqibinə aman verməyib.
2005/06 – 2
2006/07 – 3
2007/0/8 – 3
2008/09 – 2
Bu isə o deməkdir ki, AZAL-la oyunda komanda tarixinin 42-ci böyük hesablı qələbəsini qeyd edib.
Bütün xəbərlər Facebook səhifəmizdə
USD
EUR
GBP
RUB