“Beynəlxalq Əlillər Cəmiyyəti” Beynəlxalq Əlillər Gününü qeyd etdi

Məlumdur ki, 1992-ci ildə BMT Baş Məclisinin qərarı ilə dekabr ayının üçünün "Əlilliyi olan insanların Beynəlxalq günü" kimi qeyd olunması haqqında Bəyannamə qəbul edilmişdir. Əlilliyi olan insanların sosial müdafiəsinin yaxşılaşdırılması məqsədi ilə Azərbaycan Respublikası 2008-ci ildən BMT-nin Əlillərin Hüquqları haqqında Konvensiyaya qoşulub. “Beynəlxalq Əlillər Cəmiyyəti” İctimai Birliyi də ənənəvi olaraq hər il bu günü müxtəlif tədbirlərlə qeyd edir.

“Beynəlxalq Əlillər Cəmiyyəti” İB-in Sədri Tahir Xudiyevin təşəbbüsü ilə bu il Azərbaycan Yazıçılar Birliyinin (AYB) Birinci katibi, Xalq yazıçısı, hüquq elmləri doktoru, Azərbaycanın dünya şöhrətli detektiv yazıçısı, nasir, publisist Çingiz Abdullayevlə birgə “3 dekabr-Beynəlxalq Əlillər Günü” ilə əlaqədar tədbir təşkil edildi.Dekabrın 2-də Azərbaycan Yazıçılar Birliyinin Böyük zalında keçirilən tədbiri giriş sözü ilə Çingiz Abdullayev açaraq 30 noyabr 2021-ci il tarixində helikopter qəzasında həlak olmuş 14 nəfər hərbçilərimizin xatirəsini 1 dəqiqəlik sükutla yad etməyi xahiş etdi. Bundan sonra Azərbaycan Respublikasının Himni səsləndirildi, Sağlamlıq İmkanları Məhdud uşaqlar üçün 3 saylı İnternatın şagirdləri xüsusi jestlərlə Himni ifa etdilər, sonra isə yenə də jestlərlə öz ürək sözlərini bildirdilər.

Sonra Çingiz Abdullayev tək xəstə və əlilliyi olan insanlara deyil, cəmiyyətimizin bütün təbəqəsindən olan insanlara xüsusi qayğı və diqqətlə yanaşmalı olmalarından danışdı.

BƏCİB Sədri Tahir Xudiyev çıxış edərək söylədi ki, 3 Dekabr Beynəlxalq Əlillər Günü heç də bayram günü deyil. Məqsəd dövlət və digər təşkilatların, eləcə də cəmiyyətin diqqətini əlilliyi olan insanların problemlərinin həllinə yönəltməkdir. Onların ləyaqətlərinin qorunmasına, hüquqlarının müdafiəsinə, sosial rifahlarının yaxşılaşdırılmasına, həyata inteqrasiyasına nail olmaqdır.Əlilliyi olan insanların pozulmuş hüquqlarının müdafiəsində Cəmiyyətimizin gördüyü işlərə 100-lərlə misal çəkə bilərəm. İllər öncə əlilliyi olan müəllimlər onların əmək haqqlarına 25 faiz əlavə hesablanmalı olan pulun onlara verimədiyindən şikayət etmişdilər. Bundan başqa ƏƏSMN və TSEK-lər tərəfindən Cəza Çəkmə Müəssisələrindəki əlil məhkumların pensiyaları da verilmirdi, CCM-larda əlilliyi olan və imtiyazlı insanların protezləşmələri həyata keçirilmirdi, bu işlərə böyük səhlənkarlıqla yanaşılırdı. Bu problemlərin həll olunmasında da “Beynəlxalq Əlilər Cəmiyyəti” və “Əlillər Dünyası” qəzetinin xüsusi rolu olmuşdur.

Bundan başqa əlilliyi olan və imtiyazlı şəxslərlə bağlı aidiyyəti dövlət təşkilatlarına müxtəlif təkliflər vermişik. Bunlardan qəbul olunanı da olub, olunmayanı da.

Onu da deyim ki, gördüyümüz işlər heç də asanlıqla başa gəlməyib, müneçilik və təzyiqlər olub. Amma biz fikir verməmiş, işimizin öhdəsindən gəlməyə çalışmışıq.

Elə bu günkü tədbrin keçirilməsi üçün yerlə bağlı bir neçə təşkilata müraciət etsək də laqeyd yanaşıldı. Azərbaycan Yazıçılar Birliyi isə böyük məmnuniyyətlə razılıq verdi, bunun üçün xüsusi təşəkkürümüzü bildiririk.

Qarabağ qazısı, hərbi hissə komandiri Xudu Xudiyev əlilliyi olan insanların sosial problemlərinin həllində gördüyü işlərə görə BƏC İB-in kollektivinə təşəkkürünü bildirdi.

Tədbirdə DOST Agentliyini təmsil edən Leyla xanım İmanova Çingiz Abdullayevin əlilliyi olan insanlara göstərdiyi bu diqqət və qayğıya görə minnətdarlığını bildirdi.

BƏC İB İdarə Heyəti üzvləri- Zərnişan Turan, 2-ci qrup əlil Xatirə Cabbarzadə və 1-ci qrup əlil Saleh Əzizli, eləcə də Gözdən Əlillər Kitabxanasının əməkdaşı, 1-ci qrup gözdən əlil Nazlı Əliyeva, Sağlamlıq İmkanları Məhdud uşaqlar üçün 3 saylı İnternatın müəllimi Günel Kərimova əlilliyi olan insanların mövcud problemlərindən danışdılar və onların həll olunması üçün dövlət təşkilatlarının lazımi tədbir görmələri üçün fikirlərini bildirdilər.

Tədbirdə iştirak edən ƏN Penitensiar Xidmətinin əməkdaşı İlham Bədəlov, Birinci Qarabağ döyüşçüsü, AYB-nın üzvü Maşallah Məftun, şair, yazıçı, dramaturq, tərcüməçi, AYB-nın üzvü Seyran Səxavət, BƏC İB-in Qarabağ Regionu üzrə Nümayəndəliyinin rəhbəri, İdarə Heyəti üzvü Həsənağa Bayramov, BƏC İB-in Ağsaqqallar Şurasının üzvləri- Dilsuz İsmayılov və ADNSU-nun dossenti Cavid Əsgərov da çıxış etdilər.
Tədbir ərzində 1-ci qrup əlil, istedadlı gənc rəssam Ramil Əhmədovun nümayiş olunan yağlı boya ilə işlənmiş əsərləri hamını heyran etdi, Çingiz Abdullayev bu əsərlərin gözəlliyini xüsusi vurguladı.

Tədbirdə Ombudsman Aparatı, Səhiyyə Nazirliyi, Ailə, Qadın və Uşaq Problemləri üzrə Dövlət Komitəsi, Statistika Komitəsi, İşgəncələrə Qarşı Azərbaycan Komitəsi və digər dövlət təşkilatları, Azərbaycanda fəaliyyət göstərən beynəlxalq təşkilatların nümayəndələri, eləcə də icmaiyyət və KİV nümayəndələriiştirak edirdilər.
Sonda BƏC İB-in Sədri Tahir Xudiyev çıxış edərək bildirdi ki, gördüyümüz bütün işlərhəm Allah qarşısında savabdır, həm də dövlətimizin sosial siyasətinə dəstəkdir.

Bu tədbir həm 3 Dekabr Beynəlxalq Əlillər Gününün qeyd olunması, həm də oxucularının sevimli yazıçısı Çingiz Abdullayevlə görüşü idi.

Tədbirin sonunda Beynəlxalq miqyasda müasir oxucu auditoriyası formalaşdırdığına və oxucuların dərin rəğbətini qazandığına görə Xalq yazıçısı Çingiz Abdullayevə "Beynəlxalq Əlillər Cəmiyyəti"nin Fəxri Fərmanı təqdim edildi.

Bütün xəbərlər Facebook səhifəmizdə