Pensiya, sosial müavinət, təqaüdlər daha çox arta bilər

Prezident İlham Əliyev tərəfindən imzalanan Əhalinin sosial rifahının qorunması sahəsində əlavə tədbirlər haqqında sərəncam əhalinin pul gəlirlərini artırmaqla yanaşı onların sosial rifahının xeyli dərəcədə yaxşılaşmasına gətirib çıxaracaq. Hesab edirəm ki, artımlar 20 faiz civarında, bəlkə də daha çox olacaq.

Bunu SİA-ya Milli Məclisin Əmək və sosial siyasət komitəsinin sədri Musa Quliyev deyib.

M.Quliyev bildirib ki, Azərbaycanda enerji daşıyıcılarının qiymətindəki dəyişiklik çox cüzidir:

“Taariflər çox cüzi şəkildə qalxıb və Taarif Şurasnın da verdiyi izahata görə orta statistik ailənin gəlirlərinə ayda 2 manatdan çox təsir etməyəcək.
Amma cənab Prezident İlham Əliyevin sərəncamına əsasən yanvarın 1-dən əməkhaqqı, pensiya, sosial müavinət, təqaüd və digər sosial ödənişlər artırılacaq. Artımlar əhalinin həyatına xeyli dərəcədə müsbət təsir edəcək. Hesab edirəm artımlar 20 faiz civarında, bəlkə də daha çox olacaq ki, bu da əhalinin həm pul gəlirlərini artıracaq, həm də baş verən artımı tamamilə qarşılaya biləcək”.

Komitə sədri vurğulayıb ki, bu sərəncam əhalinin bütün kateqoriyalarına müsbət təsir edəcək: “Əgər dövlət büdcəsindən maliyyələşən təşkilatlarda maaşlar artacaqsa avtomatik olaraq özəl sektorda da bu artımlar müşahidə olacaq. Əgər enerji daşıyıcıların qiymətində 1-2 faiz artım varsa pensiya, sosial müavinət, təqaüd və digər sosial ödənişlər 20 faiz civarında və ya daha çox artırılması gözlənilir ki, bu da artan xərcləri nəinki kompensasiya edəcək, hələ vətəndaşlarımızın sosial rifahının yaxşılaşmasına da gətirib çıxaracaq.

O ki, qaldı enerji daşıyıcılarının qiymətinin artımına, bu, təbii prosesdir, bütün dünyada enerji daşıyıcılarının qiyməti artır və heç şübhəsiz ki, Azərbaycan dünyada izolyasiya olunmayıb və bu qiymət artımları bizə də öz təsiribi göstərir, amma buna baxmayaraq cənab Prezident qabaqlayıcı tədbir kimi bu sərəncamı imzaladı ki, əhalinin gəlirləri artsın”.

Müəllif: Ağasəf Babayev

Bütün xəbərlər Facebook səhifəmizdə

loading...