Xocalı soyqırımı şəhidlərinin xatirəsinə ağaclar əkildi - FOTOLAR

Bu il pandemiya şəraiti nəzərə alınaraq Astara rayonunda Xocalı faciəsinin ildönümü ilə əlaqədar tədbirlər online qaydada keçirilir. SİA-nın verdiyi məlumata görə, rayon icra hakimiyyətinin başçısı Qəzənfər Ağayevin təşəbbüsü ilə 23 fevral tarixində Ələt-Astara-İran İslam Respublikası avtomobil yolunun Astara şəhərinə aid hissəsində 113-ü sərv, 100-ü girdəyarpaq birgöz, 200-ü göyrüş, 200-ü dəmir ağacı olmaqla, ümumilikdə 613 ağac əkilmişdir. Bu ağaclar Xocalıda erməni terroru nəticəsində soyqırıma məruz qalan şəhidləri simvolizə edir.

XX əsrin ən ağır müsibətlərindən biri olan Xocalı faciəsi bəşər tarixində analoqu olmayan qanlı soyqırımıdır. 1992-ci il fevral ayının 25-dən 26-na keçən qanlı gecədə azğınlaşmış ermənilər keçmiş SSRİ-yə məxsus və o dövrdə Xankəndində yerləşən, tərkibi erməni zabitlərindən və əsgərlərindən ibarət olan 366-cı motoatıcı alayın iştirakı ilə Xocalı şəhərinə 11 istiqamətdən güclü hücum edərək dəhşətli terror aktı törətdilər. Cəmi 5 saat ərzində qədim Xocalı yer üzündən silinərək əhalisi dəhşətli soyqırıma məruz qaldı. Həmin qanlı gecədə Xocalı sakinlərinə amansız divan tutularaq 613 nəfər qətlə yetirildi, 1275 nəfər əsir götürüldü, 487 nəfər ömürlük şikəst oldu, 6 ailə bütövlüklə məhv edildi, 25 uşaq hər iki valideynini, 135 uşaq valideynlərindən birini itirdi. Bunların xüsusi qəddarlıqla törədilməsinə baxmayaraq, Azərbaycan xalqı bu dəhşətlərə dözərək, yenidən dirçələ bildi.

Azərbaycan Respublikasının Prezidenti cənab İlham Əliyevin uğurlu siyasəti nəticəsində dünya və beynəlxalq təşkilatlar Ermənistanı işğalçı dövlət kimi tanıdılar.

Ötən ilin 27 sentyabrında ölkə Prezidenti, Silahlı Qüvvələrinin Ali Baş Komandanı cənab İlham Əliyevin rəhbərliyi ilə erməni işğalçılarına qarşı həyata keçirilən əks-hücum əməliyyatı nəticəsində düşmən qüvvələrinin məhv edilərək ağır məğlubiyyətə uğradılması isə böyük tarixi həqiqətin bərpa edilməsi, həm də Xocalı faciəsi və zaman-zaman vəhşi düşmən tərəfindən törədilən digər qətliam qurbanlarının qisasının alınması ilə yaddaşlarda qalacaq.

Müzəffər Azərbaycan ordusu qısa müddətdə, cəmi 44 gün ərzində mənfur düşməni darmadağın edərək torpaqlarımızı işğaldan azad etməklə, ona layiq olduğu yeri göstərdi. Bu gün qəhrəman əsgər və zabitlərimiz həmin torpaqlarda dalğalanan müqəddəs bayrağımızı şərəflə qoruyurlar. Bu gün Xocalı şəhidlərinin, ümumiyyətlə, Vətən uğrunda canından keçən bütün qəhrəman Azərbaycan övladlarının ruhu şaddır.

Xocalı soyqırımı ərəfəsində bu qanlı terror qurbanlarının sayı qədər torpağa əkilən ağaclar, qədirbilən xalqımız tərəfindən şəhidlərimizin əziz xatirəsinin daim ehtiramla yad edildiyinin və heç zaman unudulmayacağının təzahürüdür.

Bütün xəbərlər Facebook səhifəmizdə

loading...