Moskva-Baku.Ru platformasının Andrey Şlyapnikov müəllifi və aparıcısı olduğu “Diqqət mərkəzində” analitik verilişində Azərbaycanda pandemiya ilə bağlı aparılan işlər və virus əleyhinə görülən tədbirlərlə bağlı maraqlı məsələlərə toxunub. Verilişdə mövzu ilə bağlı qeyd olunan məqamları oxucularımıza təqdim edirik.
Vaksinlərin kombinasiyası
Bu həftə məlum oldu ki, dünyada COVID-19 əleyhinə Rusiya istehsalı “Sputnik V” və İngilis-İsveç istehsalı “AstraZeneca” peyvəndlərin birləşməsinin ilk klinik sınaqları Azərbaycanda başlayır.Tədqiqat proqramı 6 ay üçün nəzərdə tutulub və bir neçə ölkədə baş tutacaq, hər sınaqda 100 könüllü iştirak edəcəkdir. RFPİ-nin baş direktoru Kirill Dmitriyev, koronavirusu məğlub etmək üçün gücləri birləşdirmək və ən inkişaf etmiş həllərdən istifadə etməyin vacib olduğunu söyləyib:
“Klinik sınaqlar Azərbaycanda artıq razılaşdırılıb və yaxın gələcəkdə bir sıra digər ölkələrdə başlanacaqdır. Bu, çox vacib bir inkişafdır, xüsusən də yeni mutasiyalara qarşı keyfiyyətcə mübarizə aparmaq üçün fərqli peyvəndlər arasında iş birliyi zəruridir. Və "Sputnik V", səmərəliliyi 90%-dan az olan bütün peyvəndlərə belə bir əməkdaşlıq təklif etdi, çünki peyvəndimizin effektivliyi 91,6%-dir".
Pandemiyaya qarşı mübarizədə Azərbaycanın dünyanın aparıcı ölkələrindən biri olması artıq təəccüblü deyil. Doğrudan da, əslində, koronavirusa qarşı birgə qlobal mübarizənin əsas təşəbbüskarlarından biri Prezident İlham Əliyevdir. Məhz onun təşəbbüsü ilə 130-dan çox ölkə tərəfindən dəstəklənən BMT Baş Assambleyasının Pandemiya ilə Mübarizə üzrə Xüsusi Sessiyası keçirildi. İndi Azərbaycan öz nümunəsi ilə ümumi səylərlə necə müqavimət göstərməyin mümkün olduğunu göstərəcəkdir. Siyasi faktora baxmayaraq, Rusiya vaksini “Sputnik V” nəhayət bütün dünyada tanındı və artıq 20-dən çox ölkə onun istifadəsini təsdiqlədi. Tezliklə Rusiya peyvəndi Azərbaycanda istehsal olunmağa başlaya bilər. Bununla bağlı yaxın danışıqlar aparılır. Kütləvi peyvənd normala qayıtmağı sürətləndirəcəkdir. Yeni ilin əvvəlində dünyada vəziyyət daha yaxşıdan yaxşıya doğru dəyişdi. Yanvar ayının ilk həftəsində dünyada 5 milyondan çox yeni hadisə aşkarlanıb- bu pandemiya rekordudur- fevralın ilk həftəsində isə bu, yalnız 3 milyona yaxın olub. Bu, pandemiya dövründə qlobal yoluxmanın demək olar ki, 40% azalması deməkdir.
Bu cür statistika sayəsində bəzi məhdudiyyətlər götürülməyə başlandı. Azərbaycanda tələbələr tədricən əyani təhsilə qayıdırlar. Digər bir yaxşı xəbər isə Rusiya ilə Azərbaycan arasında hava trafikinin bərpa edilməsidir. Hələlik həftədə yalnız bir neçə uçuş olacaq, lakin bu artıq köhnə həyata doğru bir addımdır. Nəqliyyat sektorunda daha bir əlamətdar hadisə bu həftə baş verdi. Türkiyədən ilk konteyner qatarı Rusiyaya Bakı-Tbilisi-Qars dəmir yolu yolu ilə gəldi. Qatar Ankaradan başlayaraq Gürcüstan və Azərbaycan ərazisindən tranzitlə keçərək təyinat yerinə - Kaluga bölgəsinə çatdı. Vorsino sənaye parkında dəmir yolu vaqonları ilə tanış olduq. Bu marşrutla ilk dəfə Rusiyaya mal ixrac olunur.
Türkiyənin Rusiyadakı səfiri Mehmet Somsar: “Əminəm ki, bu nəqliyyat dəhlizindən intensiv istifadə ediləcəkdir. Bu, yalnız dəmir yolu deyil, həm də xalqlarımızı birləşdirən bir növ dostluq körpüsü olacaqdır”.
Əlavə edim ki, Bakı-Tbilisi-Qars nəqliyyat dəhlizi logistika xərclərini və malların çatdırılma müddətini əhəmiyyətli dərəcədə azalda bilər, həmçinin Rusiya ilə Türkiyə arasındakı ticarəti sadələşdirə bilər. Bundan əlavə, ölkələr, İran, Azərbaycan və Ermənistanla birlikdə bölgədə nəqliyyat əlaqələrinin yeni bir dövrünə başlaya biləcəklər. Beləliklə, Azərbaycan özünün Naxçıvan muxtariyyəti ilə, həmçinin Türkiyə ilə, Ermənistan isə Rusiya və İranla birbaşa əlaqə əldə edəcəkdir. Bu şəbəkənin hamısı Avropadan Asiyaya marşrut olan Şimal-Cənub nəqliyyat dəhlizi ilə əlaqələndirilə bilər.
Tərcümə - Elçin Bayramlı
Bütün xəbərlər Facebook səhifəmizdə
USD
EUR
GBP
RUB