Bu gün "Trend" İnformasiya Agentliyi özünün 25 yaşını qeyd edir. Müstəqil Azərbaycanın ilk qaranquşlarından olan agentlik bülleten formatından müasir elektron xəbərləşməyə qədər həm əziyyətli, çətin, həm də şərəfli yol keçib. Bu illər ərzində agentlik lokal mediastrukturdan dünyanın nüfuzlu KİV-ləri tərəfindən tanınan regional informasiya agentliyinə çevrilib.
"Trend İA-nın müasir mətbuatımızda tutduğu yeri və imkanlarını öyrənmək üçün keçdiyi yola və indiki imkanlarına nəzər salaq. "Trend" oxuculara Azərbaycan, rus, ingilis, fars və türk dillərində xəbərlər, eləcə də Azərbaycanın və ümumilikdə regionun siyasi-ictimai həyatının bütün sahələrini əhatə edən informasiya monitorinqini təqdim edir.
Xəbərlərin təqdimatında və yayılmasında aparıcı transmilli KİV-lərin fəaliyyəti ilə bağlı tələblərə tam cavab verən ən müasir texnologiyalardan tətbiq sayəsində "Trend" dünya informasiya məkanında ən çox istinad və iqtibas olunan regional informasiya agentliklərindən birinə çevrilib. "Trend"in informasiya məhsullarının dünyanın ən nüfuzlu, aparıcı KİV-lərin informasiyasının aqreqasiya olunduğu beynəlxalq məlumat bazalarında əlçatan olması da, bəhs olunan amilə dəlalət edən faktdır.
Eyni zamanda onu da vurğulamaq gərəkdir ki, "Trend"in məhsullarının abunəçiləri arasında Azərbaycan və dünyanın iri enerji şirkətləri, banklar, kommersiya strukturları, dövlət və ictimai təşkilatlar yer alır.
Agentlik əməkdaşlarının fəaliyyəti dəfələrlə jurnalistika sahəsində milli və beynəlxalq mükafatlara layiq görülüb.
SƏS Media Qrup olaraq həmkarlarımızı 25 illik yubiley münasibətilə təbrik edir, onlara bol-bol uğurlar arzulayırıq
Bütün xəbərlər Facebook səhifəmizdə
USD
EUR
GBP
RUB