“DOST” mərkəzlərində vətəndaş qəbulu bərpa olundu

“DOST” mərkəzlərində vətəndaş qəbulu bərpa olunub. Dayanıqlı və Operativ Sosial Təminat - DOST Agentliyindən SİA-ya verilən məlumata görə, iyun ayının 21-dən etibarən ölkəmizdə elan olunan sərtləşdirilmiş xüsusi karantin rejimini ilə əlaqədar “DOST” mərkəzlərində də vətəndaş qəbuluna fasilə verilmişdi. Müraciətlər yalnız onlayn şəkildə qəbul olunurdu. 5 avqust 2020-ci il tarixindən etibarən isə vətəndaş qəbulu bərpa olunub. Mərkəzlər saat 9:00-dan 18:00-a qədər vətəndaşların xidmətində olub.

İlk gündə Bakı şəhərində fəaliyyət göstərən DOST mərkəzlərinə rekord sayda vətəndaş müraciəti qeydə alınıb. Müraciət edən vətəndaşların ümumi sayı 1718 nəfər olub.

“DOST” mərkəzlərinə daxil olan vətəndaş müraciətlərinin 74%-i əmək pensiyası və sosial müavinət sahələrində göstərilən xidmətlər üzrə, 17%-i məşğulluq sahəsində göstərilən xidmətlər üzrə, 5%-i əlillik və sağlamlıq imkanlarının məhdudluğu sahəsində göstərilən xidmətlər üzrə, 4%-i isə Əmək və Əhalinin Sosial Müdafiəsi Nazirliyinin fəaliyyət istiqamətlərinə dair arayışlar verilməsi üzrə olub.

Vətəndaşlara xidmət prosesi zamanı Ümumdünya Səhiyyə Təşkilatının (ÜST) Covid-19 virusundan qorunmaqla bağlı tövsiyələrinə əməl edilib. Əməkdaşların qoruyucu maskalarla təmin edilməsi ilə yanaşı DOST mərkəzlərində vətəndaşların da dezinfeksiyaedici məhlullardan istifadə etməsi üçün şərait yaradılıb. Mərkəzlərə gələn vətəndaşların da qoruyucu maskalarından istifadə etmələri və sosial məsafə saxlamaları tövsiyə edilib.

Qeyd edək ki, ölkəmizdə tətbiq edilən xüsusi karantin rejimi ilə əlaqədar iyun ayının 21-dən etibarən DOST mərkəzlərində xüsusi iş rejimi tətbiq edilirdi. Vətəndaşların müraciətləri yalnız e-poçt və “Çağrı Mərkəzi 142” vasitəsilə qəbul edilirdi.

Xatırladaq ki, hazırda Bakı şəhərində 3 “DOST” məkəzi fəaliyyət göstərir. Bu mərkəzlər paytaxtın Yasamal, Səbail, Qaradağ, Nizami, Sabunçu, Suraxanı, Xəzər və Pirallahı rayonlarından qeydiyyatda olan əhaliyə xidmət göstərir.

Bütün xəbərlər Facebook səhifəmizdə

loading...