Neft geologiyası sahəsində tanınmış alim, geologiya-mineralogiya elmləri namizədi, dosent Bakir İsmayıl oğlu Məhərrəmovun 60 yaşı tamam olub. Bu münasibətlə İnstitut kollektivi adından yubilyara təqdim edilən təbrik məktubunu diqqətinizə çatdırırıq.
ƏZİZ VƏ ÇOX HÖRMƏTLİ BAKİR MÜƏLLİM!
Biz, SOCAR, “Neftqazelmitədqiqatlayihə” İnstitutunun kollektivi Sizi, doğum gününüzün 60 illiyi münasibətilə səmimi qəlbdən təbrik edib və ən xoş arzularımızı bildiririk.
Sizə, ilk növbədə can sağlığı, uzun ömür, ailə səadəti, şəxsi həyatınızda, bu şərəfli elmi fəaliyyətinizdə yeni-yeni uğurlar arzulayırıq. Arzu edirik ki, Siz, bundan sonrakı dövrdə də Azərbaycan elminə xidmət edəsiniz.
Geologiya-mineralogiya elmləri namizədi, dosent Bakir İsmayıl oğlu Məhərrəmov neft-qaz yataqlarının geologiyası, axtarışı və kəşfiyyatı, neftli-qazlı hövzələrin paleocoğrafi, paleotektonik, paleostruktur inkişafı, struktur-tektonik quruluşunun aydınlaşdırılması və quyuların qazılması zamanı baş verən geoloji mürəkkəbləşmələrin qarşısının alınması istiqamətində elmi-tədqiqat işləri ilə məşğul olmuş Azərbaycanın tanınmış alimlərindəndir.
B.Məhərrəmov 56 elmi əsərin, o cümlədən 2 monoqrafiyanın (“Azərbaycanın neftli-qazlı rayonlarının paleogeologiyası", “Azərbaycanın quru ərazisində neft-qaz-geoloji rayonlaşdırma”), 1 xəritənin ("Azərbaycanın quru ərazisinin neftqazrayonlaşdırma xəritəsi"), müəllifidir. Bakir müəllim Azərbaycanın görkəmli geoloqlarının stratiqrafiya sahəsində apardıqları elmi-tədqiqat işləri nəticəsində ayrı-ayrı çöküntü qatlarına verdikləri adlarla beynəlxalq stratiqrafik adların müqayisəli stratiqrafik şkalasını hazırlamışdır. Hal-hazırda bu şkaladan həm neft sənayesi müəssisələrində çalışan mütəxəssislər, həm də “Azərbaycan Dövlət Neft və Sənaye Universiteti”nin müəllim və tələbələri geniş istifadə edir.
O, “Amerika Neftçi Geoloqları Assosasiyası"nın Azərbaycan bölməsində, “Azərbaycan Neftçi Geoloqları Cəmiyyəti”nin vitse-Prezidenti, sonlarar isə Prezidenti kimi bu şərəfli və çox məsuliyyətli vəzifələrə rəhbərlik etməyə layiq görülmüşdür.
Bakir müəllim 2017-ci ildə "Neft və qaz sənayesinin inkişafında xüsusi xidmətlərinə görə" Azərbaycan Respublikası Dövlət Neft Şirkətinin (SOCAR) Fəxri Fərmanı ilə təltif edilmişdir.
Həmişə yüksək erudisiyası və elmi potensialı ilə fərqlənən Bakir İsmayıl oğlu Məhərrəmovun zəhmətsevərliyi, işgüzarlığı, təvəzökarlığı, yüksək mədəniyyəti və digər insani keyfiyyətləri ona, həm sənət yoldaşlarının və həmkarlarının arasında hörmətini, eləcədə İnsititut rəhbərliyinin etimadını qazandırmışdır. Bakir müəllimin Azərbaycanın quru ərazisində yeni neft-qaz yataqlarının aşkar edilməsi istiqamətində apardığı elmi tədqiqatlar və əldə etdiyi nailiyyətlər indiki və gələcək neftçi-geoloqlar nəslinə bir təcrübə və örnək məktəbidir.
HÖRMƏTLİ BAKİR MÜƏLLİM!
Siz, həqiqətən çoxillik elmi fəaliyyətinizin və 60 illik şərəfli ömür yolunuzun böyük hissəsini Azərbaycanda Geologiya elminin inkişafına və gənc neftçi-geoloq kadırlarının hazırlanmasına həsr etmisiniz. İcazə verin Sizi, bir daha bu şərəfli tarixi yaddaş günü münasibətilə ürəkdən təbrik edək, elmi yaradıcılıq yolunda Sizə möhkəm can sağlığı və yeni uğurlar diləyək.
Qoy hər gününüz uğurlu anlarla, hər ayınız xoş sədalarla, hər iliniz xoş əhval-ruhiyyə ilə başlasın. Rəhbırlik etdiyiniz laborotoriyanın əməkdaşları və böyük ailəniz olan institut kollektivi isə həmişə bundan qürur duysun və Sizinlə fəxr etsin.
Böyük hörmət və ehtiramla!
SOCAR, “Neftqazelmitədqiqatlayihə” İnstitutunun kollektivi
Bütün xəbərlər Facebook səhifəmizdə
.jpg)
USD
EUR
GBP
RUB