Astarada FHN-in səyyar mobil hospitalı quraşdırılıb

İran İslam Respublikasında yeni tip koronavirusa yoluxma və ölüm hallarının aşkarlanması ilə əlaqədar olaraq, fevralın 28-dən Astara sərhəd-buraxılış məntəqəsinə yaxın ərazidə Fövqəladə Hallar Nazirliyinin (FHN) səyyar mobil hospitalı fəaliyyət göstərir. Nazirliyin Tibb Mərkəzinin rəisi, tibb xidməti polkovniki Kamal Əliyev bildirib ki, ərazidə 450 çarpayılıq 59 çadır quraşdırılıb. Burada quraşdırılan hospitalda dövlət sərhəd buraxılış məntəqəsini keçən bütün vətəndaşlar müayinə olunacaqlar. Müayinələr zamanı vətəndaşlarda hər hansı bir xəstəlik aşkar olunarsa, həmin şəxslər təcili tibbi yardım maşınları ilə xüsusi ixtisaslaşdırılmış xəstəxanalara göndəriləcək.

Sərhədi keçən vətəndaşların müayinəsi 8 həkim və 8 tibb işçisi tərəfindən aparılacaq.
Fevralın 29-dan başlayaraq səyyar mobil hospitalda dövlət sərhədini keçən vətəndaşların müayinəsinə başlanılacaq.

Ərazidə görülən işlərə FHN-nin 100 nəfər şəxsi heyəti, 20 texnikası cəlb olunub.

Astara ilə yanaşı, Biləsuvar gömrük-sərhəd buraxılış məntəqəsində də səyyar mobil hospital fəaliyyətə başlayıb.

Qeyd edək ki, koronavirus xəstəliyinin Azərbaycan ərazisində yarada biləcəyi təhlükənin qarşısının alınması, profilaktik və təxirəsalınmaz tədbirlərin operativ həyata keçirilməsi məqsədilə Nazirlər Kabinetinin yanında aidiyyəti dövlət orqanlarının və qurumlarının rəhbər şəxslərindən ibarət qərargah yaradılıb. Qabaqlayıcı tədbirlərin görülməsi və Azərbaycan Respublikasının bütün ərazilərində monitorinqin aparılması üçün aidiyyəti sahə mütəxəssislərindən ibarət ekspert qrupları təşkil olunub. Həmçinin əhalinin məlumatlandırılması və əsassız dezinformasiyaların qarşısının alınması məqsədilə qərargahın +994 12 492 41 61, +994 12 492 75 54, +994 12 505 03 30, + 994 12 505 13 33 nömrəli “qaynar xətləri” fəaliyyət göstərir.

Bütün xəbərlər Facebook səhifəmizdə

loading...