Akademik Cəlal Əliyevin dünya fotosintez elminə verdiyi töhfələri nəzərə alaraq, Beynəlxalq Fotosintez Cəmiyyəti (ISPR – International Society on Photosynthesis Research) Cəlal Əliyevin şərəfinə “Davamlı inkişaf naminə fotosintez və hidrogen enerjisi tədqiqatları” mövzusunda 9-cu beynəlxalq konfransın keçirilməsi haqqında qərar qəbul edib və onun adına (The Jalal Aliyev Lecture Scholarship Award) mükafat təsis edilib.
SİA-nın məlumatına görə, Cəlal Əliyev adına mükafatı alan ilk alim Yaponiyanın Okoyama Universitetinin professoru Jian-Ren Shen olub. 17-18 dekabr 2018-ci il tarixlərində Bakı şəhərində keçirilən konfransda mükafat Beynəlxalq Fotosintez Cəmiyyətinin katibi, professor Julian Eaton-Rye tərəfindən şəxsən professor Jian-Ren Şenə təqdim edilib.
Qeyd etmək lazışdır ki, Jian-Ren Shen 1961-ci ildə Çinin Jeçianq vilayətində anadan olub, 1982-ci ildə Jecianq Kənd Təsərrüfatı İnstitutunu bitirib, 1986-cı ildə Yaponiyanın Tokio Kənd Təsərrüfatı və Texnologiyası Universitetində magistr dissertasiyasını müdafiə edib, 1990-cı ildə isə bu universitetdə fəlsəfə doktoru dərəcəsini alıb. 1990-1997-ci illərdə Yaponiyanın RIKEN İnstitutunda Günəş Tədqiqatları qrupunda tədqiqatçı alim kimi işləyib. 1997-2003-cü illərdə həmin institutda böyük elmi işçi kimi fəaliyyət göstərib. 2003-cü ildən bu günə kimi Yaponiyanın Okayama Universitetinin professorudur. Eyni zamanda, Yaponiya Fənlərarası Tədqiqatlar İnstitutunun professoru və dekan müavinidir. Professor Jian-Ren Şenin tədqiqatları fotosintetik sistemlərin struktur və funksiyasının öyrənilməsinə həsr olunub. O, 2011-ci ildə ilk dəfə olaraq 2-ci fotosistemin strukturunu 1.9 Å dəqiqliklə müəyyən etmiş (Nature, 2011) və bu nailiyyət Science jurnalında “2011-ci ilin kəşfi” adlandırılmışdır. O, öz qrupu ilə birlikdə 2-ci fotosistemin radiasiyadan zədələnməyən quruluşunu (Nature, 2015), 2-ci fotosistemin aralıq quruluşunu (Nature, 2017), ali bitkilərdə FSI-LHCI quruluşunu (Science, 2015), fotosintetik bakteriyada LH1-RC-nin quruluşunu (Nature, 2018) və s. müəyyənləşdirib. Professor Jian-Ren Şen Yaponiyada bir sıra mükafatlara, o cümlədən, nüfuzlu Asahi mükafatı (2013) və Yaponiyanın Baş nazirinin Yaşıl Elm mükafatına (2017) layiq görülüb.
Bütün xəbərlər Facebook səhifəmizdə
USD
EUR
GBP
RUB