Bu gün FHN-in Gəncə Regional Mərkəzi Daşkəsən Rayon İcra Hakimiyyəti ilə birgə Daşkəsən rayonunda mülki müdafiənin mövcud vəziyyəti ilə bağlı müşavirə keçirib. SİA-nın Gəncə bürosunun verdiyi məlumata görə, Rayon Mədəniyyət Mərkəzində baş tutan müşavirədə Daşkəsən Rayon İcra Hakimiyyətinin başçısı Əhəd Abıyev, FHN-in Gəncə Regional Mərkəzinin əməkdaşları, rayon fövqəladə hallar komissiyasının sədri, idarə, müəssisə və təşkilatların rəhbərləri, həmçinin mülki müdafiə işinin təşkilinə cavabdeh şəxslər, KİV mənsubları iştirak ediblər.
Daşkəsən Rayon İcra Hakimiyyətinin başçısı Ə.Abıyev müşavirədə çıxış edərək bildirib ki, 2018-ci ildə də rayonun idarə, müəssisə və təşkilatları Fövqəladə Hallar Nazirliyinin Gəncə Regional Mərkəzi ilə razılaşdırdıqları illik mülki müdafiə tədbirlər planları əsasında mülki müdafiə tədbirlərinin icrasının vaxtında təmin olunması, əhaliyə və işçilərə mülki müdafiə sahəsində biliklərin öyrədilməsi, ehtimal olunan fövqəladə hadisələrin nəticələrinin operativ aradan qaldırılması üçün Mülki Müdafiə qüvvələrinin hazırlıq səviyyəsinin yüksəldilməsi tədbirlərinin həyata keçirilməsini təşkil ediblər: "Bu ilin 24 mart və 24 iyun tarixlərdə Daşkəsən rayonu ərazisində təbii fəlakətlər baş verib. Təbii fəlakətin vurduğu ziyanların aradan qaldırılmasında rayonun ərazi mülki müdafiə qüvvələri yüksək səviyyədə iştirak ediblər. Əhalinin maarifləndirilməsi ilə bağlı müxtəlif tədbirlər həyata keçirilib. Tədbirlər zamanı mülki müdafiəyə həsr olunmuş konfrans, seminar, yığıncaqlar və mülki müdafiə qüvvələrinin xəbərdarlıq toplanış məşqi, məktəblərdə açıq dərslər keçirilib, mülki müdafiə əmlaklarının sərgiləri təşkil olunub, yaralanmalar zamanı ilkin tibbi yardımın göstərilməsi və yanğınların qarşısının alınması üsulları, fövqəladə hallar zamanı təxliyənin təşkili qaydaları nümayiş etdirilib.
Daşkəsən rayon əhalisinin və ərazisinin fövqəladə hallardan qorunması, insanların təhlükəsizliyinin təmin olunması sahəsində, eləcə də fövqəladə halların qarşısının alınması, nəticələrinin aradan qaldırılması istiqamətində qabaqlayıcı tədbirlərin həyata keçirilməsi üçün Fövqəladə Hallar Nazirliyinin tabeçiliyində olan qurumlarla Daşkəsən Rayon İcra Hakimiyyəti arasında qarşılıqlı fəaliyyət bundan sonra da məqsədəmüvafiq olaraq davam etdiriləcəkdir".
Ə.Abıyevin çıxışından sonra FHN-in Gəncə Regional Mərkəzinin Mülki müdafiə hazırlığı şöbəsinin rəisi mayor Rauf Abbasov və FHN-in Gəncə Regional Mərkəzinin Mülki müdafiə idarəsinin rəisi Emin Məmmədov çıxış ediblər. Müşavirədə Daşkəsən rayonunda mülki müdafiə işinin mövcud vəziyyəti hərtərəfli təhlil olunub, habelə mülki müdafiə işinin təşkilinin gücləndirilməsi, planlaşdırılması, əhalinin baş verə biləcək fövqəladə hallara hazırlanması və mülki müdafiə dəstələrinin daimi hazırlığının təmin edilməsinə diqqətin artırılması istiqamətində tövsiyələr verilmiş, 2019-cu il üçün qarşıda duran vəzifələr müəyyənləşdirilib.
Sonra göstərilən məsələlərlə bağlı dinləmələr keçirilib, suallar cavablandırılıb.
Bütün xəbərlər Facebook səhifəmizdə
USD
EUR
GBP
RUB