Azərbaycanda ödənişsiz psixoloji yardım alacaq şəxslərin kateqoriyası müəyyənləşib. SİA-nın məlumatına görə, bu, yeni hazırlanan "Psixoloji yardım haqqında" qanun layihəsində əksini tapıb. Qanunun 6-cı (Psixoloji yardımın maliyyələşdirilməsi) maddəsinə əsasən, psixoloji yardım dövlət büdcəsinin vəsaiti hesabına (ödənişsiz) və ya yardım alan şəxsin vəsaiti hesabına (ödənişli) həyata keçirilir.
Aşağıdakı hallarda şəxsin ödənişsiz psixoloji yardım almaq hüququ var:
1. Şəxsin yaşayış yeri və ya olduğu yer üzrə dövlət ambulator-poliklinika müəssisəsində və ya həmin müəssisənin göndərişi ilə ixtisaslaşdırılmış dövlət tibb müəssisəsində,
2. Məktəbəqədər və orta təhsil müəssisələrində təhsilalanların,
3. Həbs edilən şəxslərin,
4. Penitensiar müəssilərdə cəza çəkən şəxslərin, eləcə də cəza çəkməkdən azad edilən və psixoloji yardıma ehtiyacı olan şəxslərin,
5. Dövlət yardım mərkəzilərində məişət zorakılığından zərər çəkən şəxslərin,
6. Silahlı Qüvvələrdə xidmət keçən hərbi qulluqçuların,
7. Hərbi əməliyyatlar zamanı zərər çəkən şəxslərin,
8. Sosial xidmətə cəlb edilən şəxslərin,
9. Fövqəladə hallar zamanı zərər çəkən şəxslərin, onların ailə üzvlərinin, habelə fövqəladə halların nəticələrinin aradan qaldırılmasında iştirak edən şəxslərin,
10. Peşə fəaliyyəti yüksək təhlükə mənbəyi ilə bağlı olan şəxslərin – işə götürənin vəsaiti hesabına,
11. Tibbi-sosial reablitasiya zamanı əlilliyi olan şəxslərin və onların ailə üzvlərinin.
Qanunla pulsuz psixoloji yardımın göstərilməsinin digər halları da nəzərdə tutula bilər. Psixoloji yardımın həcmi və müddəti psixoloji yardım alan şəxsin ehtiyaclarına mütənasib olmalıdır. Bundan əlavə, qanun layihəsində Azərbaycanda Psixoloqlar Şurasının yaradılması da nəzərdə tutulub. Qanunun 21-ci (Azərbaycan Psixoloqlar Şurası) maddəsinə sasən, psixoloji xidmət göstərən mütəxəssislərin fəaliyyətinin əlaqələndirilməsi, onların peşə hüquqlarının qorunması, təcrübə mübadiləsinin aparılması və təbliği, peşəkarlıq səviyyəsinin yüksəldilməsi, əhalinin keyfiyyətli psixoloji xidmətlə təmin edilməsinə və psixoloji xidmət sahəsində elmi tədqiqatların aparılmasına köməklik göstərilməsi və psixoloji yardım standartlarının və etika normalarının işlənib hazırlanması məqsədilə müvafiq icra hakimiyyəti orqanı tərəfindən Azərbaycan Psixoloqlar Şurası yaradılır.
Şura ictimai əsaslarla fəaliyyət göstərir və yüksək ixtisaslı psixoloqlardan, müxtəlif sahələrdə psixoloji xidmət göstərən dövlət orqanlarının nümayəndələrindən ibarət olmaqla 7 üzvdən ibarətdir. Şuranın fəaliyyəti, hüquq və vəzifələri, üzvlərin təyin olunması ə idarə edilməsi qaydası müvafiq icra hakimiyyəti orqanı tərəfindən təsdiqlənən "Azərbaycan Psixoloqlar Şurası haqqında Əsasnamə" ilə müəyyən edilir. Qanun layihəsi birinci oxunuşda qəbul edilib.
Bütün xəbərlər Facebook səhifəmizdə
USD
EUR
GBP
RUB