Azərbaycan Respublikasının Birinci vitse-prezidenti Mehriban Əliyevanın dəstəyi və Macarıstan Respublikası Xarici İşlər və Xarici İqtisadi Əlaqələr Nazirliyinin, Macarıstan Respublikasının Azərbaycandakı Səfirliyinin, Azərbaycan Respublikasının Macarıstandakı Səfirliyinin, Azərbaycan Milli Elmlər Akademiyasının və AMEA Mərkəzi Elmi Kitabxanasının təşkilatçılığı ilə İmre Madaçın "İnsanın faciəsi" kitabının təqdimatı ilə "Bakıda Macarıstan günləri"nin açılış mərasimi keçirilib. SİA-nın verdiyi məlumata görə, tədbiri giriş sözü ilə açan Macarıstanın Azərbaycandakı səlahiyyətli səfiri İmre Laslotski Azərbaycan dilində hər kəsi salamlayaraq, iştirakçıların Novruz bayramını təbrik etdi, tədbirin təşkil olunmasına görə təşkilatçılara təşəkkürünü bildirdi.
Azərbaycan Milli Elmlər Akademiyasının vitse-prezidenti, akademik İsa Həbibbəyli Azərbaycan və Macarıstan arasındakı mənəvi bağların dərinliyindən danışaraq macar xalqını daha yaxşı əsrin əvvəllərində Əli bəy Hüseynzadənin "Haqq-ı Pərəstan" adlandırması ilə tanıdığımızı diqqətə çatdırdı. İki dövlət arasında qarşılıqlı dostluq və qardaşlıq münasibətlərinin yüksək səviyyədə olduğunu, bunun bariz nümunəsi kimi də Azərbaycan və Macar əlaqələrinin bütün istiqamətlərdə genişləndiyini, xüsusilə elmi-ədəbi sahədə ciddi əlaqələr qurulduğunu vurğuladı. "Bakıda Macarıstan günləri"nin ilk tədbirinin kitab təqdimatı ilə başlamasının da buna bariz misal olduğunu dedi. Akdemik İ.Həbəbbəyli ilk dəfə Azərbaycan dilinə tərcümə edilən "İnsan faciəsi" romanının Hüseyn Cavidin "İblis", Məhəmməd Hadinin "Əlvahı İntibah" əsərləri ilə eyni motivdə olduğunu dedi. İ.Həbibbəyli Azərbaycan yazıçılarının əsərlərini macar dilinə tərcümə edən Maria Kenneşi qədər dəqiq, ahəngdarlıq və sevgi ilə macar müəlliflərini tərcümə edən Rasim Müzəffərliyə öz təşəkkürünü bildirdi.
Naşir, "İnsanın faciəsi" kitabının tərcüməçisi Rasim Müzəffərli əsərin onun ilk tərcümə işi olduğunu dilə gətirdi. İmre Madaç kimi dahi yazarın əsərinə müraciət etməyin məsuliyyətini və çətinliyini dilə gətirən R.Müzəffərli kitabda Maria Kenneşinin məsləhət və tövsiyyələrindən bəhrələndiyini dedi. Naşir kitabın ərsəyə gəlməsində ön sözün müəllifi akademik İsa Həbibbəyliyə, Xarici İşlər Nazirliyinə, Macarıstanın Azərbaycandakı səfirinə, həmçinin kitabın məsləhətçisi kimi yaxından köməklik göstərən Mərkəzi Elmi Kitabxananın direktoru Leyla İmanovaya minnətdarlığını bildirdi. Sonra tədbir iştirakçılarına əsərdən kiçik parçalar təqdim etdi.
Macar türkoloqu Maria Kenneşi Azərbaycan-Macar tarixi əlaqələrində bu günün xüsusi yeri olduğunu, macar ədəbiyyatının incisi İmre Madaçın "İnsanın faciəsi" poetik dramının Azərbaycan oxucularının öz ana dillərində oxuyacaq olmalarının sevincini yaşadığını dedi. Məsləkdaşı şair-bəstəkar Rasim Müzəffərlinin tərcüməni qısa zaman içərisində yüksək səviyyədə icra etdiyini, əsəri real və sözlərin ritmik ahəngdarlığı içərisində etdiyini diqqətə çatdırdı.
AMEA Nizami adına Ədəbiyyat İnstitutunun şöbə müdiri, professor Asif Rüstəmli Maria Kenneşinin həyatı ilə bağlı qısa arayış verdi. Maria Kenneşə akademik İsa Həbibbəyli tərəfindən Azərbaycan Yazıçılar Birliyinin vəsiqəsi və hədiyyələr təqdim edildi.
Tədbir zamanı iştirakçıları Azərbaycanın əməkdar artisti Gülnaz İsmayılova tərəfindən macar bəstəkarı Ferens Listin əsərindən ibarət musiqi parçaları təqdim edildi.
Qeyd edək ki, tərcümənin redaktoru, Bakı Dövlət Universitetində təhsil almış, Azərbaycan-Macarıstan ədəbi əlaqələrinin inkişafında yaxından iştirak edən macar mütəxəssisi Maria Keneşidir.
Ümumbəşəri dəyərlərin təbliğinə və dünya azərbaycanlılarının macar ədəbiyyatının incilərindən sayılan əsərlə tanış olmasına xidmət edən bu nəşrin tərcümə edilməsi görkəmli türkoloq alim Georq Hazainin böyük arzusu idi. Onun qızı Sesilia Hazainin rəhbərlik etdiyi "Twin Media" şirkəti layihənin həyata keçirilməsində yaxından iştirak edib, "1001 kitab" nəşriyyat evinin tərəfdaşı olub. Kitabın məsləhətçisi Mərkəzi Elmi Kitabxananın direktoru Leyla İmanovadır.
Xatırladaq ki, 17 mart 2017-ci il tarixdə "Bakıda Macarıstan günləri"nin ikinci hissəsi Macarıstan Respublikasının Azərbaycandakı Səfiri İmre Laslotskinin, Professor Janos Hovarinin və digər qonaqların iştirakı ilə saat 11:00 – da başlayacaq.
Bütün xəbərlər Facebook səhifəmizdə
USD
EUR
GBP
RUB