Bu gün kənd təsərrüfatı naziri Heydər Əsədov VII Azərbaycan –Rusiya Regionlararası Forumunda iştirak etmək üçün Bakı şəhərində rəsmi səfərdə olan Rusiya Fedrerasiyasının Tümen vilayətinin qubernatoru Vladimir Yakuşev ilə görüşüb. SİA-nın verdiyi məlumata görə, Azərbaycan Respublikası ilə Tümen vilayəti arasında kənd təsərrüfatı sahəsində əməkdaşlıq imkanlarının genişləndirilməsi və kənd təsərrüfatı məhsullarının idxal və ixrac proseslərinin səmərəliliyinin artırılması görüşün əsas müzakirə mövzularından olub.
Qonağı səmimi salamlayan nazir Heydər Əsədov Azərbaycan Respublikasının Rusiya Federasiyası ilə ənənəvi olaraq iqtisadi, siyasi, o cümlədən aqrar sahədə geniş əlaqələrə malik olduğunu vurğulayaraq, kənd təsərrüfatının iqtisadiyyatın prioritet sahəsi kimi ölkə başçısının daima diqqət və qayğısı ilə əhatə olunduğunu qeyd edib.
Nazir Azərbaycanın iqlim şəraitinin kənd təsərrüfatının müxtəlif sahələrinin inkişafı üçün əlverişli olduğunu, ölkəmizdə istehsal olunan kənd təsərrüfatı məhsullarının ekoloji baxımdan keyfiyyətliliyini qonağın nəzərinə çatdırıb.
Görüşdə nazir ölkənin ixrac potensialı ilə bağlı geniş məlumat verərək Azərbaycan ilə Tümen vilayəti arasında kənd təsərrüfatı məhsullarının ixracı sahəsində əməkdaşlıq üçün geniş imkanların olduğunu vurğulayıb. Vilayətin kənd təsərrüfatı məhsullarına olan tələbatının Azərbaycan məhsulları ilə vaxt və xərc itkisini azaltmaqla təmin olunmasının mümkünlüyünü qubernatorun diqqətinə çatdırıb. Nazir Heydər Əsədov Tümen vilayətinin ehtiyac duyduğu kənd təsərrüfatı məhsullarının, idxal və ixrac potensialı əsasında öncədən müəyyənləşdirilərək, Tümen vilayətinin sahibkarlarının birbaşa sifarişi əsasında Azərbaycandan qarşı tərəfə ixrac olunmasını təklif edib.
Tümen vilayətinin qubernatoru Vladimir Yakuşev görüşdən məmnun qaldığını ifadə edərək görüş zamanı nazir tərəfindən irəli sürülən təklifin təqdirəlayiq olduğunu qeyd edib.
Görüşün sonunda qeyd olunan məsələlər ilə bağlı işçi qrupu səviyyəsində qarşılıqlı müzakirələrin aparılmasına ilkin razılıq ədə olunub.
Bütün xəbərlər Facebook səhifəmizdə
USD
EUR
GBP
RUB