"Bakı Şəhər Baş Polis İdarəsinin Dövlət Yol Polisi İdarəsi Bakıda hökm sürən hava şəraiti ilə əlaqədar əraziləri nəzarətə götürüb. Səhər saat 8-00-dan bu saata qədər Bakı şəhər üzrə yol və metroloji şərait nəzərə alınmadığından 1 yol qəzası baş verib". Bu barədə SİA-ya Bakı Şəhər Baş Polis İdarəsinin Dövlət Yol Polisi İdarəsinin ictimai qurumlarla əlaqə bölməsinin rəisi, polis polkovniki Vaqif Əsədov məlumat verib.
Onun sözlərinə görə, yol qəza hadisəsi nəticəsində avtomobil maneəyə çırpılıb: "Xəsarət alan yoxdur. Hadisə nəticəsində yüngül maddi zərər ortaya çıxıb".
Qurumun gücləndirilmiş iş rejimində çalışdığını deyən V. Əsədov söyləyib ki, hava şəraiti nəzərə alınaraq polis nəfərləri xüsusi geyimlə təchiz olunub.
İdarəsinin ictimai qurumlarla əlaqə bölməsinin rəisi vurğulayıb ki, bəzən yağışlı hava şəraitində Bakı şəhərində çalışan bəzi işıqforların fəaliyyətində nöqsan çıxa bilir: "Lakin işıqforların iş prinsipinin dayanması sürücüləri çaşdırmamalıdır. Belə hava şəraitində sürücülər tələblərə uyğun hərəkət etməlidirlər. Onlar həmin ərazilərdə nizamlanmayan yol ayrıcı olduğunu qəbul etməli və burada hərəkət qoyulan yol nişanlarına uyğun aparılmalıdır. Əgər ərazidə yol nişanları yoxdursa, o zaman sürücülər əraziyə uyğun olaraq sağdan yaxınlaşıb, soldakı nəqliyyat vasitəsinin hərəkətinə təhlükəsiz şərait yaratmalı yol verilməlidir".
V. Əsədov qeyd edib ki, belə havalarda sürət həddi minimuma endirilməli, ara məsafəsi normadan artıq saxlanmalı, diqqəti çəkən söhbətlər edilməməli, avtomobillər hərəkətə gətirilib, dayandırıldıqda avtomatik və ya mexaniki sürət qutusu hesaba alınmalıdır: "Yaxşı olardı ki belə hava şəraitində peşəkar sürücülərin hərəkətinə şərait yaradılsın. Yağışlı havada avtomobil sürməyə uyğunlaşmayan sürücülər ictimai nəqliyyat vasitələrindən istifadə etsələr daha yaxşı olar. Avtomobil idarə edənlər su gölməçələrinin yanından keçərkən diqqətli olmalı, piyadaların üstünü çirkləndirməməlidirlər. Bu artıq İnzibati məsuliyyət yaradır".
Polis polkovniki etiraf edib ki, qeyri-sabit hava şəraiti sürücülərin peşəkarlaşmasında böyük rol oynayır: "Son illər Azərbaycanda yağmurlu, şaxtalı, qarlı havaların daha çox hökm sürdüyü üçün artıq sürücülərimiz peşəkarlaşmağa başlayıb. Bu,sevindirici haldır. Bu baxımdan son illər qeyri-sabit hava şəraiti zamanı qəzaların sayı əvvəlki illərə nisbətən azalıb".
Bütün xəbərlər Facebook səhifəmizdə
USD
EUR
GBP
RUB