Siyavuş Novruzov: “Hərbçilərin meyitlərini Qarabağda gizlədirlər” MÜSAHİBƏ

Yeni Azərbaycan Partiyası icra katibinin müavini, millət vəkili Siyavuş Novruzov teleqraf.com-un suallarını cavablandırıb:

- Azərbaycanda Bakı BMT Sivilizasiyalar Alyansının VII Qlobal Forumu keçirilir. Bu Forumun əhəmiyyəti nədən ibarətdir?

- VII Qlobal Forum çox mühüm tədbirdir. Bu il cənab Prezident İlham Əliyev tərəfindən Azərbaycanda multikulturalizm ili elan olunub. BMT kimi mötəbər təşkilatın Sivilizasiyalar Alyansının VII Qlobal Forumunun Bakıda keçirilməsi vacib hadisədir. Bu, Azərbaycanın dinlərarası münasibətlər, tolerantlıqla bağlı dünyada olan mövqeyinin göstəricisidir. Artıq ölkəmizdə beynəlxalq tədbirlərin keçirilməsi ənənə halını alıb. Bu gün ölkəmizdə keçirilən tədbirlər Azərbaycanın iqtisadi inkişafı, ölkəmizdə olan ictimai-siyasi sabitlik, Prezidentimizin dünyada apardığı xarici siyasətin nəticəsidir. Bu tədbirdə 140 ölkədən iki minədək nümayəndə heyəti yüksək səviyyədə iştirak edir.

Burada qəbul olunacaq qərarlar istər dünyada sülhün bərqərar olmasına, istərsə də dinlər və irqlərarası münasibətlərin tənzimlənməsinə böyük töhfə verəcək. Azərbaycan ərazisinin işğal olunması, dövlətimizin ərazi bütövlüyünün pozulması, BMT qətnamələrinə əməl edilməməsi kimi hallar cənab Prezident tərəfindən bütün dünya ictimaiyyətinin nəzərinə çatdırıldı. Eyni zamanda bu Forumu yayımlayan çoxsaylı xarici telekanallar Azərbaycan həqiqətlərini dünyaya çatdırır.

- Dünən başlayan Forum cəbhə bölgəsində yaşanan gərginlik fonunda baş tutur. Artıq müdafiə naziri Tərtərə səfər edib, cəbhəyanı bölgədə yaşayan sakinlərlə görüşüb. Sizcə, bu gərginlik yenidən silahlı toqquşmalara gətirib çıxara bilərmi?

- Cəbhədə gərginliyin artması Ermənistanın təxribatının nəticəsidir. Cənab Prezident İlham Əliyev də bəyan edib ki, Ermənistan təxribata əl atsa, tutarlı cavabını alacaq. Bir dəfə Ermənistan cavabını aldı, bu dəfə yenə sakit dayanmasa, daha betər cavab veriləcək. Hesab edirəm ki, dünən cəbhədəki gərginlik Ermənistanın daxili aləmi sakitləşdirməkdən ötəri etdiyi növbəti provokasiyadır. Aprelin əvvəlində olan döyüşdə çox sayda erməni hərbçi öldü və çoxlu yaralılar var. Ermənistan hərbçilərin meyitlərinin bir hissəsini Dağlıq Qarabağda gizlədir, bir hissəsi isə gizli dəfn olunub. Hərbçilərin böyük hissəsi Suriyadan və başqa-başqa yerdən gələnlər idi. Bu haqda informasiya vermirlər. Əminliklə deyə bilərik ki, ermənilərin təxribatlarının qarşısı alınacaq. Azərbaycan Ordusu hər bir provokasiyanın qarşısını almağa qadirdir.

- Belə versiyalar var ki, yay aylarında uzunmüddətli müharibə olacaq. Bu versiyalar nə qədər gözləniləndir?

- Münaqişənin həll olunması, sülh prosesinin bərpası üçün ATƏT-in Minsk qrupu cəhd göstərdi. Müxtəlif ölkələr, ayrı-ayrı beynəlxalq təşkilatlar problemin sülh yolu ilə həll edilməsinə tərəfdar olduğunu qeyd etdi. Azərbaycan sülhə sadiqliyini nümayiş etdirdi. Amma Ermənistan tərəfindən təxribat olacaqsa, təbii ki, qarşısı alınacaq.

- Dünən Ermənistan prezidenti Serj Sərkisyanın danışıqlardan imtina ilə bağlı bəyanatı oldu. Bu bəyanatı necə şərh edərdiniz?

- O bəyanat Ermənistanın daxili aləmi, özləri üçün hesablanmış bəyanat idi. Yüksəkliklərin alınması, Azərbaycanın öz ərazisinin bir hissəsini bərpa etməsi Ermənistanın iqtidarlı müxalifətli siyasi aləmində və cəmiyyətində ciddi narazılıq yaradıb. Ermənistan əhalisi başa düşdü ki, Azərbaycanla silah və müharibə yolu ilə danışmaq olmaz. Ermənistandakı mövcud hakimiyyət Dağlıq Qarabağ münaqişəsi üzərində hakimiyyətə gəlib. O baxımdan çalışırlar ki, bu kartdan yenə də istifadə eləsinlər. Ancaq bu, baş tutan deyil. Çünki hər bir şey hər kəsə aydındır.

Bütün xəbərlər Facebook səhifəmizdə