Lənkərana 9 minə yaxın turist gəlib FOTOLAR

Lənkəran Şəhər İcra Hakimiyyəti baçısının sosial-iqtisad və proqnozlaşdırma şöbəsinin müdiri İlkin Rəhimov 2015-ci ilin birinci yarımilində Lənkəran rayonunun sosial-iqtisadi inkişafı ilə bağlı məruzə edib. Qeyd edib ki, ötən 6 ay ərzində rayonda ümumi məhsul buraxılışı 136,6 milyon manat təşkil edib. Sənayedə 10.9 milyon manatlıq və ya ötən ilin müvafiq dövrünə nisbətən 7.6 % çox məhsul istehsal olunub. Sənayenin qeyri-dövlət sektorunda istehsalın həcmi 7 % artıb və ümumi həcmdə onun xüsusi çəkisi 59.8 % təşkil edib. 2015-ci ilin məhsulu üçün 8112 hektar payızlıq və yazlıq bitkilər əkilib. İyulun 1-i vəziyyətinə 1361 ton taxıl, 3414 ton kartof, 26404 ton tərəvəz, 1612 ton meyvə, 53,5 ton yaşıl çay yarpağı yığılıb. 2015-ci il Cənab Prezident İlham Əliyev tərəfindən "Kənd təsərrüfatı" ili elan edilib. Bununla əlaqədar sahibkarlar və fermerlərlə söhbətlər aparılıb və onlara ərzaq təhlükəsizliyinin qorunması, ekoloji təmiz məhsulların istehsalı üçün əkin sahələrinin dövriyəyə cəlb edilməsi və məhsuldarlığın artırılması ilə əlaqədar tövsiyələr verilib. Bunun nəticəsidir ki, rayonda yeni "Gilan arqo-sitrus" təsərrüfatı yaradılıb. Yeni sitrus təsərrüfatının ümumi sahəsi 45 hektardır. Hazırda 15 hektar ərazidə "Gilan Agro" şirkəti tərəfindən Cənubi Koreyadan gətirilən "Hallabong" sitrus meyvəsinin ağacları əkilib. Gələcəkdə təsərrüfat genişləndirilərək 500 hektara yaxın ərazini əhatə edəcək. O, cümlədən dağətəyi ərazilərdə terras əkin üsulu ilə sitrus plantasiyaları salınacaq. Aparılacaq işlərin nəticəsində istifadəsiz qalmış torpaqlar yenidən kənd təsərrüfatı dövriyyəsinə qatılacaq və bu 2 min daimi iş yerinin yaranmasına imkan verəcəkdir. Rayonda geniş abadlıq və quruculuq işləri aparılır. Rayon ərazisində küçə, bağ və parklarda 525 kv metr hasar hörülüb, 3100 kv metr suvaq və divarlara 39950 kv metr rəng vurulub, 45000 ədəd gül kolu, 600 ədəd dekarativ və 1200 ədəd müxtəlif növ ağaclar əkilib. Azərbaycan Respublikası Prezidentinin müvafiq Sərəncamı ilə ayrılmış 5 milyon 602 min manat vəsaitə uyğun olaraq on min nəfər əhalinin yaşadığı üç yaşayış məntəqəsini birləşdirən 18.8 km-lik Liman-Nərimanabad-Balıqçılar avtomobil yolu yüksək səviyyədə tikilib və Azərbaycan Respublikasının Prezidenti Cənab İlham Əliyevin iştirakı ilə istifadəyə verilib. Hazırda Aşagı Nüvədi-Kənarmeşə-Şürük yolunun yenidən qurulması işlərinə başlanılıb. Rayon ərazisində 4 ədəd dəmir-beton konstruksiyalı avtomobil körpüsü quraşdırılıb, 2 ədəd körpü əsaslı təmir olunub. Cari ilin altı ayında rayonda ümumilikdə 1338 yeni iş yeri açılıb, onlardan 1045-i daimi iş yerləridir.

Təhsilin maddi-texniki bazasının gücləndirilməsi üçün də tədbirlər davam etdirilir, hazırda Darquba kənd orta məktəbinin tikintisində son tamamlama işləri görülür. Bundan əlavə məktəbə qədər təhsil müəssisələrinin tikintisinə də qayğı göstərilir. Lənkəran şəhərində 120 yerlik müasir tipli uşaq bağçası istifadəyə verilib. Rayon məktəbliləri idman yarışlarında da uğurla çıxışlar edirlər. Lənkəran şəhər Şahmat məktəbinin yetirməsi Kənan Əhədzadə yanvar ayında "Moskva Open 2015" Beynəlxalq şahmat festifalında 2-ci yeri tutub. Cənab Prezidentin göstərişinə əsasən əhalinin ümumi profilaktik müayinələrə cəlb olunması ilə bağlı şəhər icra hakimiyyəti başçısının sərəncamı ilə şəhər əhalisinin müayinə olunması Lənkəran Mərkəzi Rayon Xəstəxanasının Konsultativ Poliklinika şöbəsinə və Lənkəran Müalicə Diaqnostika Mərkəzinə həvalə olunub. Kənd əhalisinin müayinədən keçməsi üçün ixtisaslı həkimlərdən ibarət briqadalar təşkil edilib və yaşayış məntəqələrinə göndərilib. Birinci yarımilində ümumilikdə 114834 nəfər tibbi müayinədən keçib, aşkar olunmuş 314 nəfər xəstə Bakı şəhərinə müalicə olunmaq üçün göndərilib.

Məruzədə daha sonra qeyd edilib ki, şəhərin qədim tarixini özündə əks etdirən Tarix Diyarşünaslıq Muzeyində (Xan evi) əsaslı təmir-bərpa işləri görülüb. Bundan əlavə Mərkəzi Kitabxanın fasad hissəsi dəyişdirilib. Əhaliyə göstərilən turizm xidmətinin səviyyəsinin müasir tələblər səviyyəsində qurulması üçün turizm obyektlərində monitorinqlər keçirilib. 2015-cı ilin 6 ayı ərzində rayona gələn turistlərin sayı 9 minə yaxın olub. Əksər mehmanxana və mehmanxana tipli obyektlər bu tələblərə cavab versə də, hələ də bir sıra turizm obyektlərində xidmətin səviyyəsi aşağıdır. Eyni zamanda orada turistlərə göstərilən xidmət haqqı yüksəkdir. Hazırda yeni Olimpiya İdman Kompleksi və 11 mərtəbəli 5 ulduzlu otel kompleksinin tikintisi davam etdirilir. Bu sahədə ardıcıl işlər görülməlidir. Eyni zamanda rayonda iki və üç ulduzlu otellərin tikintisi ilə əlaqədar sahibkarların təşəbbüsləri dəstəklənəcəkdir. Görülən işlərlə yanaşı, qeyd olunub ki, növbəti yarımildə rayonda turizmin daha da inkişaf etdirilməsi üçün tədbirlərin görülməsi nəzərdə tutulub. Aqrar sahədə işlərin surətləndirilməsi, əkin sahələrinin genişləndirilməsi, çayçiliğın inkişafına diqqətin artırılması, sahibkarlığın daha da inkişaf etdirilməsi, yeni istehsal obyektlərinin yaradılması və yeni iş yerlərinin açılması nəzərdə tutulub.

Daha sonra məruzə ətrafında çıxışlar olub. Tədbirə İcra başçısı Taleh Qaraşov yekun vuraraq qarşıda duran vəzifələri bir daha diqqətə çatdırıb.

Sərraf Mirsəfəroğlu