Bu gün Elmin İnkişaf Fondunun maliyyə dəstəyi və təşkilatçılığı ilə "Günəş və Günəş tipli ulduzların dəyişkənliyi:astroseysmologiyadan kosmik havaya qədər" beynəlxalq konfrans keçirilib. SİA-nın məlumatına görə, konfransda Danimarka, Fransa, Almaniya, ABŞ, Rusiya, Ukrayna, İsrail, Bolqarıstan, İngiltərə, Özbəkistan və Gürcüstandan olan alimlər iştirak ediblər.
Konfransı açıq elan edən Elmin İnkişafı Fondunun icraçı direktoru Elçin Babayev konfransın ölkəmiz üçün olduqca mühüm əhəmiyyət kəsb etdiyini qeyd edərək deyib ki, son illər azərbaycanlı alimlər həm Günəş, həm də kosmik hava təsirləri üzrə intensiv tədqiqatlar aparırlar: "Bu istiqamətdə dünyanın bir sıra ölkələrindən olan alimlərlə əməkdaşlıq edirlər. Azərbaycan alimlərinin elmi məqalələri xarici jurnallarda dərc edilir, onların təcrübələrindən istifadə edilir. Bu da alimlərimizin dünya miqyasında tanınmasında böyük rol oynayır. Şamaxı Astrofizika Rəsədxanasında Günəş teleskoplarının modernləşdirilməsi, Kosmik hava mərkəzinin formalaşdırılması isə bu sahədəki inkişafdan, nailiyyətlərdən xəbər verir". Elçin Babayev həmçinin konfrans iştirakçılarına uğurlar arzu edib. Daha sonra Günəş fizikası və Günəş - Yer əlaqələri sahəsində ən son yenilikləri özündə əks etdirən məruzələr dinlənilib, mövzu ətrafında müzakirələr aparılıb.
Qeyd edək ki, 6-8 iyul tarixlərində davam edəcək kionfransın bir günü AMEA Nəsərəddin Tusi adına Şamaxı Astrofizika Rəsədxanasında baş tutacaq. 2 gün davam edəcək konfransda Günəşin daxili qatlarını xüsusi nəzəri və eksperimental yollarla tədqiq edən modern elm sahəsi – helioseysmologiya/astroseysmologiya üzrə bir sıra mühüm məruzələr dinləniləcək. Günəşdə rəqslər və dalğalar, Günəşin yerüstü və kosmik üsullarla eksperimental tədqiqi, Günəş fəallığı, Günəş plazması, Günəş alışmaları, Günəş neytrino problemi, Günəş küləyi, Günəşin maqnit sahəsi və s. üzrə çıxışlar olacaq, müzakirələr aparılacaq. Bir neçə məruzə Günəş və kosmik şüalar fəallığının Yer üzərində iqlimin formalaşmasına, həmçinin texnoloji sistemlərə və insan sağlamlığına təsirinə həsr olunacaq.
İntizarə Məmmədova
Bütün xəbərlər Facebook səhifəmizdə
USD
EUR
GBP
RUB