"Bakı – 2015" I Avropa Oyunları və ictimai davranış qaydaları ilə bağlı Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyələşdirdiyi layihələrin müzakirəsi keçirilib. SİA-nın məlumatına görə, tədbirdə çıxış edən şuranın sədri Azay Quliyev bildirib ki, bu məqsədlə şuraya təqdim olunan 27 layihəyə 300 min manat vəsait ayrılıb.
A. Quliyev bildirib ki, hər bir şəxs oyunların keçirilməsində öz məsuliyyətini hiss etməli və ona uyğun davranış sərgiləməlidir: "Vətəndaş cəmiyyəti institutları da bu oyunların yüksək səviyyədə keçirilməsinə öz töhfəsini verməlidir. Şura isə I Avropa Oyunları zamanı ictimai davranış qaydaları ilə bağlı layihələri dəstəkləyir. Məqsədimiz odur ki, cəmiyyət maariflənsin".
Şura sədri qeyd edib ki, hazırda bir çox məsələlərə ictimai nəzarət gücləndirilməlidir: "Bu gün sürücülər elementar qaydalara əməl etmir, lazımsız səs siqnallarından istifadə edərək, insanları narahat edirlər. Restoranlarda xidmət səviyyəsi artırılmalı, qiymətlər süni şəkildə qaldırılmamalıdır. Yəni, bizim məqsədimiz ondan ibarətdir ki, çəkdiyimiz əziyyət qeyri-etik davranışlar nəticəsində hədər getməsin".
A. Quliyev təəssüflə vurğulayıb ki, hazırda innovativ layihələrin şuraya təqdim olunmasında qıtlıq var.
Tədbirdə iştirak edən Bakı şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi Vaqif Əsədov bildirib ki, yol hərəkəti iştirakçılarının mədəni səviyyəsinin yüksəldilməsi istiqamətində təbliğat işləri aparılır: "Sevindirici haldır ki, həyata keçirilən layihələr nəticəsində uğurlar əldə olunur. Ancaq, hələ də sürücülərimiz siqnallarından yerli-yersiz istifadə edir, xüsusən axşam saatlarında avtomobili yüksək surətlə idarə edir. Hesab edirəm ki, bu kimi neqativ hallara qarşı mübarizə gücləndirilməlidir".
Daha sonra QHT sektorunun nümayəndələri fikir mübadiləsi aparıb, təkliflərini səsləndiriblər.
Tədbirin sonunda şura sədri Azay Quliyev deyib ki, səsləndirilən təkliflər yazılı şəkildə şuraya təqdim olunsun: "Biz bütün səsləndirilən təklifləri nəzərə alaraq, mövcud problemlərin aradan qaldırılması üçün Bakı Şəhər İcra Hakimiyyətinə məktubla müraciət edəcəyik".
Bütün xəbərlər Facebook səhifəmizdə
USD
EUR
GBP
RUB