Milli Məclisin bu gün keçirilən plenar iclasında "Dövlət qulluğu haqqında" qanuna dəyişikliklər barədə məsələ müzakirəyə çıxarılıb. SİA-nın məlumatına görə, qanunun 31.6-cı maddəsinə edilən dəyişikliyə əsasən attestasiya zamanı dövlət qulluqçularına onların xidməti fəaliyyətinə bilavasitə aid olmayan sualların verilməsi qadağan olunur.
Qanunun 31.5-ci maddəsinə də dəyişiklik ediləcək. Bu maddənin yenilənmiş variantına görə, attestasiyanın keçirilməsinin müddətləri, cədvəli və bu qanunun 31.6-cı maddəsində göstərilən sualların hazırlanmasında istifadə olunan hüquqi aktların və digər məlumat mənbələrinin siyahısı müvafiq icra hakimiyyəti orqanı ilə razılaşdırılmaqla müvafiq dövlət orqanı tərəfindən təsdiq edilir və attestasiyanın başlanmasına ən geci 1 ay qalmış attestasiyadan keçən dövlət qulluqçularının nəzərinə çatdırılır.
"Dövlət qulluğu haqqında" qanunun 31.16-cı maddəsinə edilməsi nəzərdə tutulan dəyişikliklərə görə isə attestasiya vərəqələrinə attestasiyanın nəticələri (qiymət və tövsiyələr) ilə yanaşı, attestasiya zamanı verilən suallar və cavablar da yazılacaq.
Qanuna əlavə edilmiş 31.22-ci maddədə isə qeyd edilib ki, dövlət qulluqçusunun attestasiyasının keçirilməsi qaydaları icra hakimiyyəti orqanı tərəfindən müəyyən edilir.
Qanuna edilən dəyişikliklər müzakirələrdən sonra səsverməyə çıxarılaraq qəbul olunub.
Bütün xəbərlər Facebook səhifəmizdə
USD
EUR
GBP
RUB