Nazirlik ağacəkmə aksiyası keçirib FOTOLAR

24 Dekabr 2014 13:22 | 696

Bu gün Ekologiya və Təbii Sərvətlər Nazirliyi tərəfindən bir neçə ərazidə, o cümlədən Zığ – Heydər Əliyev Beynəlxalq Hava Limanı magistral avtomobil yolunun 10-cu kilometrliyində iməcilik keçirilib. SİA-nın məlumatına görə, ərazidə yeni ağacların əkilməsi və salınmış yaşıllıqlara qulluq göstərilməsi məqsədilə təşkil olunan aksiyada Ekologiya və Təbii Sərvətlər Nazirliyinin əməkdaşları ilə birgə Qeyri – Hökümət Təşkilatları və Kütləvi İnformasiya Vasitələrinin ümumilikdə 1000-dən çox nümayəndəsi iştirak edib.

İməcilikdə Zığ – Heydər Əliyev Beynəlxalq Hava Limanı magistral avtomobil yolunun 30 hektar ərazisində yeni ağaclar əkilib, təzə əkilən ağaclar suvarılıb, mövcud yaşıllıqlara isə aqrotexniki qulluq göstərilib.

Qeyd edək ki, Azərbaycan Respublikasının Prezidenti İlham Əliyevin ölkədə ekoloji tarazlığın qorunmasına göstərdiyi xüsusi diqqət nəticəsində yeni yaşıllıqların salınması istiqamətində ciddi irəliləyişə nail olunub. Ölkə başçısının tapşırığı əsasında son bir neçə ildə magistral avtomobil yollarının kənarlarında, Bakı və Bakı ətrafındakı arid ərazilərdə, o cümlədən iməciliyin keçirildiyi Zığ Heydər Əliyev Beynəlxalq Hava Limanı magistral avtomobil yolu ətrafında milyonlarla ağac əkilib. Əkinlərin müasir metodlarla becərilməsi, damcılı suvarma ilə təchiz olunması və daim onlara aqrotexniki qulluq göstərilməsi nəticəsində 80 – 90 faiz bitiş alınmasına müvəffəq olunub.