Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın iştirakı ilə IDEA İctimai Birliyinin heyvanlar üçün sığınacağının təməlqoyma mərasimi keçirilib. SİA-nın xəbərinə görə, mərasim zamanı Leyla Əliyeva mərkəzin layihəsi və maketi ilə yaxından tanış olub. Leyla Əliyevaya yeni inşa ediləcək sığınacaq haqda ətraflı məlumat verilib.
Qeyd edilib ki, sığınacaqda sahibsiz və ya atılmış insana kampaniyon heyvanların, xüsusilə it və pişiklərin müvəqqəti və ya daimi məskunlaşması üçün şəraitin yaradılması, daxilində xüsusi baytarlıq klinikasının fəaliyyət göstərməsi, burada heyvanların müayinə və müalicəsi, lazım gəldiyi halda onların üzərində cərrahiyə əməliyyatının aparılması üçün hər növ avadanlığın quraşdırılması nəzərdə tutulub.
Mərkəzdə yerli baytarlar üçün təlimlər, ixtisasartırma kurslarının, məktəblilər üçün xüsusi turların təşkili planlaşdırılır. Bununla bağlı, xüsusi təlim otaqlarının tikilməsi və ən son avandanlıqların təmin olunması layihəyə daxil edilib.
Eyni anda 5000-ə qədər insana kampaniyon heyvanların, xüsusilə it və pişiyin yerləşdirilməsinə imkan verən mərkəzin layihələndirilməsində digər ölkələrin təcrübəsindən istifadə olunub. Sığınacaqda sahibsiz və ya atılmış it və pişiklərlə yanaşı, şəhər mühitində tez-tez rast gəlinməyən heyvan növlərinin də (atlar, bəzi quş növləri və s.) müayinə və müalicəsi mümkün olacaq.
Sözügedən sığınacaq-bəsləmə məntəqəsinin yaradılmasında məqsəd Bakı küçələrində və ətraf rayonlarda sahibsiz heyvanların sayının azaldılması, onların qanunsuz öldürülməsinin və bu cür heyvanlarda tez-tez rast gəlinən quduzluq xəstəliyinin insanlara keçməsinin qarşısının alınmasıdır.
Bütün xəbərlər Facebook səhifəmizdə
USD
EUR
GBP
RUB