Oktyabrın 3-də Lənkəran şəhərində əhalinin qurbanlıq heyvanlara olan tələbatını ödəmək və bazarda süni qiymət artımının qarşısını almaq məqsədi ilə satış yarmarkası təşkil edilib. SİA-nın Cənub bürosunun verdiyi məlumata görə, qurbanlıq üçün nəzərdə tutulmuş mal-qara və davarlar Lənkəran Zona Baytarlıq Laboratoriyasının əməkdaşları tərəfindən tibbi müayinədən keçirilib.
Bayram yarmarkasına rayonda fəaliyyət göstərən 15 fermer təsərrüfatlarından və fiziki şəxslərdən 5 minə yaxın xırdabuynuzlu mal-qara çıxarılıb. Qiymətlər bazar qiymətindən 20-25 faiz aşağıdır.
Yarmarkada qoyulmuş nəzarət tərəzilərində çəkilmiş qurbanlıq ət əhaliyə diri çəkidə 4 manata, kəsilmiş halda isə 8 manata təklif olunur.
Həmişə olduğu kimi, bu il də Qurban bayramı ilə əlaqədar Lənkəran rayonunda məskunlaşan məcburi köçkün ailələri, Qarabağ müharibəsi əlilləri, şəhid və imkansız ailələr diqqətdən kənarda qalmayıb. Bayram günlərində bu təbəqədən olan 4 min 200 nəfərə qurbanlıq payı veriləcəkdir.
Bayram yarmarkası iki gün davam edəcəkdir.
Sərraf Mirsəfəroğlu
Bütün xəbərlər Facebook səhifəmizdə
USD
EUR
GBP
RUB