Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının təşkilatçılığı ilə İsmayıllı rayonunda "QHT-lərin müsbət təcrübəsinin yayılması və qanunvericiliyə edilən son əlavə və dəyişikliklər" mövzusunda konfrans keçirilib.
Şura Katibliyindən verilən məlumata görə, Heydər Əliyev Mərkəzində baş tutan toplantıda rayon ictimaiyyətinin nümayəndələri, icra hakimiyyətinin, bələdiyyələrin və QHT-lərin təmsilçiləri iştirak ediblər.
Tədbirdə çıxış edən Qəbələ Regional QHT-lərin Resurs və Təlim Mərkəzinin direktoru Qalib Nəbiyev bölgədəki QHT-lərin fəaliyyət istiqamətləri, həyata keçirdikləri layihələr haqqında danışaraq Şuranın məlumatlandırma xarakterli bu cür tədbirlər keçirməsinin regionlarda vətəndaş cəmiyyətinin inkişafına xidmət etdiyini söyləyib.
Şura Katibliyinin baş məsləhətçisi Fərid Rüstəmov çıxış edərək vətəndaş cəmiyyətinin inkişafı istiqamətində ölkəmizdə ardıcıl həyata keçirilən dövlət siyasəti haqqında danışıb və QHT-lərin müsbət təcrübəsinin yayılmasının zəruri olduğunu bildirib.
F.Rüstəmov Şuranın QHT-lərə göstərdiyi dövlət dəstəyinin əsas istiqamətləri, maliyyələşdirilən layihələr, regionlarda fəaliyyət göstərən təşkilatlara edilən yardımlar, bütövlükdə vətəndaş cəmiyyətinin inkişafı sahəsində həyata keçirilən tədbirlər haqqında iştirakçılara məlumat verib. O, QHT-lərlə bağlı qanunvericilik aktlarına edilən son əlavə və dəyişikliklərin mahiyyəti haqqında məlumat verərək onların mövcud boşluqları aradan qaldırmaq və vətəndaş cəmiyyəti qurumlarının fəaliyyətində şəffaflığın təmin olunmasına xidmət etdiyini vurğulayıb.
Şuranın baş məsləhətçisi "2008-2015-ci illərdə Azərbaycan Respublikasında yoxsulluğun azaldılması və davamlı inkişaf Dövlət Proqramı"nın həyata keçirilməsində Şuranın üzərinə düşən vəzifələr və həyata keçirdiyi tədbirlər haqqında da danışıb.
F.Rüstəmov tədbirin sonunda iştirakçıların yoxsulluğun azaldılması sahəsində görülən işlər, QHT-lərin fəaliyyəti, qanunvericilikdə edilmiş son əlavə və dəyişikliklər və digər məsələlərlə bağlı suallarını cavablandırıb.
Bütün xəbərlər Facebook səhifəmizdə
USD
EUR
GBP
RUB