Standartlaşdırma, Metrologiya və Patent üzrə Dövlət Komitəsinin Yeyinti və kənd təsərrüfatı məhsullarının sınağı laboratoriyası növbəti beynəlxalq səviyyəli uğura imza atıb. Qurumun mətbuat xidmətindən SİA-ya verilən xəbərə görə, Komitənin Təcrübə- Sınaq Mərkəzinin (AzTEST) Yeyinti və kənd təsərrüfatı məhsullarının sınağı laboratoriyası Almaniyanın Akkreditasiya Qurumu – DakkS tərəfindən növbəti dəfə akkreditasiya olunub.
Belə ki, beynəlxalq mütəxəssislərin auditi zamanı AzTEST qida laboratoriyasının imkanları bir daha araşdırılıb, laboratoriyanın daha səkkiz metodu öncəki akkreditasiya sahələrinə əlavə olunub. Bunlar mikrobioloji sınaqlardan "Staphilococcus aureus", "koliformlar", fiziki-kimyəvi sınaqlardan "suda xloridlərin təyini", "Ph və elektrik keçiriciliyi", ət və ət məhsullarında toksiki metallardan "arsen", "qurğuşun" və "kadmium" elementlərinin təyini, fındıq və fındıq məhsullarında "aflatoksin B1. B2, G1, G2 təyini" metodlarıdır.
Məlumat üçün bildirək ki, ötən il Komitənin Təcrübə-Sınaq Mərkəzinin (AzTEST) laboratoriyası Almaniya Akkreditasiya Qurumu (DAkkS) tərəfindən akkreditasiya olunub. DakkS mütəxəssislərinin sınaq laboratoriyasında apardıqları auditin nəticəsində qurulub infrastruktur, tətbiq edilən müasir sınaq avadanlıqları, səriştəli kadr potensialı və sınaqların düzgün metodlarla aparılması xüsusi qiymətləndirilib, bütün növ ərzaq məhsullarının sınağının İSO/İEC 17025:2005 beynəlxalq standartı əsasında həyata keçirildiyi barədə qərar qəbul edilmişdir. Bundan başqa, DakkS AzTEST-in laboratoriyasında bütün növ ərzaq məhsullarının mikrobioloji sınağını, o cümlədən meyvə şirələrində ağır metallar və titrlənən turşuların təyini, qablaşdırılmış içməli sularda kimyəvi analizləri yüksək qiymətləndirib, adıçəkilən sahələr üzrə də laboratoriyanı akkreditasiya edib.
Almaniya Akkreditasiya Qurumu tərəfindən Azərbaycan Respublikasında qurulan müasir sınaq laboratoriyasının akkreditasiyası ölkə sahibkarlığının inkişafı istiqamətində qazanılan növbəti müvəffəqiyyət kimi qiymətləndirilməkdədir. Belə ki, adıçəkilən akkreditasiya Komitənin laboratoriyasının sınaq protokollarının xaricdə tanınmasını, bununla da yerli müəssisələrin istehsal etdikləri ərzaq məhsullarının maneəsiz Avropa Birliyi ölkələrinə ixracını, ixrac imkanlarının genişlənməsini, yerli sahibkarların xarici bazarlarda özlərinə layiqli yer tutmaları üçün əlverişli şəraitin yaranmasını təmin edəcək.
Bütün xəbərlər Facebook səhifəmizdə
USD
EUR
GBP
RUB