Canımız istiyə soyuqdan daha davamlı olsa da, qızmar yay günləri də səhhətimizə təsrisiz ötüşmür. İsti hava şəraiti ilə bağlı mütəxəssislərin tövsiyyəsini təqdim edirik. Həkimlər bu günlər insanları sağlamlıqlarına qarşı daha diqqətli olmağa çağırır. Çünki, isti hava şəraiti ilk növbədə ürəyi zəif adamlara mənfi təsir göstərir.
Terapevt Gülnarə Ağayevanın sözlərinə görə, isti hava şəraiti hətta bəzi ürək xəstələrini kritik duruma sala bilər: "Xüsusilə də ürək çatışmazlığı olan insanların vəziyyəti yay aylarında xeyli pisləşir. Bu vəziyyətin yaranmasına əsas səbəb isə istidə tərləmə vasitəsilə insan orqanizminin xeyli miqdarda su və duz itirməsidir. Yayda ürək xəstəliyi olan insanlarda aritmiya ehtimalı da artır ki, bu da ürək çatışmazlığı olan xəstələrin əsas ölüm səbəblərindən biridir. Aritmiyaların kəskinləşməsinə isə elektrolit pozulmaları səbəb olur. İsti hava şəraitində tənəffüs sistemində problemi olan xəstələr də özlərini pis hiss edirlər. Bu onların psixologiyasına mənfi təsir göstərir".
Həkim məsləhət görür ki, qarşıdakı isti günlərdə ürək xəstəliyi olan insanlar ilk növbədə, qəbul etdikləri qidaya diqqət yetirsinlər: "Xüsusilə də, orta yaşlı insanlar qidadan kərə yağını çıxartmalı, mal əti və ondan hazırlanan yeməklərdən uzaq durmalıdırlar. Daha çox meyvə tərəvəzdən hazırlanan yeməklərə üstünlük verilməlidir. Yay aylarında ürək xəstəlikləri olanlara havanın sərin vaxtı, səhər və axşam saatlarında gəzintiyə çıxmaq da faydalıdır.
Yayın isti günlərində Günəş şüalarının təsirindən daha çox ehtiyatlanmaq lazımdır. Bu günlər saat 12:00-dan 16:00-a kimi günün altında qalmamağa çalışın. Çünki Günəş şüaları açıq havada uzun müddət olan hər kəsə pis təsir göstərə və günvurmaya səbəb ola bilər".
Gülnarə Ağayevanın sözlərinə görə, günvurma çox vaxt ürək bulanması, qusma, başgicəllənməsi, baş ağrısı, rəngin avazıması ilə müşayiət olunur. Bu zaman gün vuran insan hətta huşunu da itirə bilər. Həkimin sözlərinə görə, günvurma nəticəsində beyin damarlarının daralması, dəri damarlarının genişlənməsi, təzyiqin aşağı düşməsi, güclü tərləmə səbəbindən qanın qatılaşması baş verə bilər. Ümumilikdə xəstənin vəziyyəti onun günün altında nə qədər qalmasından asılıdır. Həkim məsələhət görür ki, gün vuran insanı dərhal sərin və kölkəli məkana keçirtmək lazımdır. Əgər ürəkbulanma və qusma varsa və xəstə huşsuz vəziyyətdədirsə, onun başını yana çevirmək lazımdır ki, qusma kütlələri nəfəs yolunu tutmasın. Xəstənin huşu özündədirsə, ona ilıq maye içirtmək olar:"Dədə-babalarımız həmişə gün vuran adama ayran, qatıqla kömək ediblər. Çünki tərləmə zamanı insan bədəni çoxlu duz itirir. Çox vaxt xəstənin vəziyyətinin kəskinləşməsi məhz bu səbəbdən baş verir. Bu mayelər isə bədəndə duzun bərpasına kömək edir. Günvuran a damlara sistem şəklində 1-1,5 litrə yaxın maye köçürülməlidir. Xəstənin temperaturunu aşağı salmaq üçün onun bədənini buzla su ilə silmək lazımdır. Bu məqsədlə damarların, bud arteriyalarının üzərinə, qoltuq altına, boyuna buz da qoyula bilər. Kimyəvi preparatlara gəlincə, gün vuran insana yardım göstərən həkim belə maddələrdən istifadə etməmişdən əvvəl xəstənin orqanizminin vəziyyətini dəqiq öyrənməlidir: "Əgər xəstənin ürək fəaliyyəti zəifdirsə, bu zaman ona kafein, kordeamin vurulmalıdır. Amma xəstənin təzyiqi yüksəkdirsə, təbii ki, bu preparatlardan istifadə etmək olmaz".
Həkimin sözlərinə görə, günvuran adamları bir müddət sərin otaqda, yataq şəraitində saxlamaq lazımdır: "Lazım gələrsə, belə xəstələr qospitalizasiya olunur və onların stasionar müalicəsi aparılır. Xəstənin huşu özündə olmayanda isə onu mütləq reanimasiya şəraitində müalicə etmək lazımdır".
Həkim deyir ki, ümumilikdə günəş şüaları təzyiqi, ürək-damar sistemində problemləri olanlar daha tez və pis təsir göstərir. Şəkərdən, onkoloji xəstəliklərdən, piylənmədən əziyyət çəkənlər də qızmar günlərdə ehtiyatlı olmalıdırlar. Həkimin sözlərinə görə, ümumiyyətlə, hər kəs qızmar yay günlərində ən azı 2 litr maye qəbul etməlidir ki, orqanizm istiyə müqavimət qabiliyyətini itirməsin.
Bütün xəbərlər Facebook səhifəmizdə
USD
EUR
GBP
RUB