AMEA Mərkəzi Elmi Kitabxanasının hazırladığı "Azərbaycanın repressiya olunmuş alimləri: biobiblioqrafik göstərici" adlı kitab çapdan çıxıb. SİA-nın xəbərinə görə, kitabın elmi redaktoru Mərkəzi Elmi Kitabxananın direktoru Aybəniz Əliyeva-Kəngərli, redaktor-biblioqraf direktor müavini Firəngiz Füseynova, tərtibçilər N. Kazımova və V. Həsənovadır.
Azərbaycan və rus dilində təqdim olunan 580 səhifədən ibarət bu kitab, 1920-1940-cı illər ərzində Azərbaycan SSR XDİK üçlüyünün müxtəlif tarixli qərarlarına əsasən repressiya olunmuş Azərbaycan alimlərinin həyat və yaradıcılıqlarına həsr edilib. Burada həmçinin Cəlal Qasımovun tədqiq edərək üzə çıxardığı Az.SSR XDİK üçlüyünün verdiyi qərarlara əsasən qeyd edilən illər ərzində repressiya edilən insanların adlarının siyahısı da əks etdirilib.
Təqdim olunan kitab indiki Azərbaycan Milli Elmlər Akademiyası üzrə repressiyaya məruz qalmış alimlərin həyatı, elmi fəaliyyəti və faciəli talelərinə həsr olunub. Tərtibçi müəlliflər Azərbaycan Respublikasının Prezident Arxivində, Respublika Dövlət Arxivində, MEA-nın arxivində, AMEA-nın MEK-də, M.F.Axundov adına Milli Kitabxanada və onun arxivində, Tarix muzeyində, BDU-nun kitabxanasında, Əlyazmalar institutunun müvafiq fondlarında, AMEA-nın Tarix və Ədəbiyyat İnstitutlarının arxivlərində intensiv axtarışlar apararaq onlarca alimin bioqrafiyasını yazıya alıb, mövcud faktları müxtəlif tərzdə sistemləşdirib.
Akademiyada repressiyaya məruz qalan alimlər daha çox humanitar sahənin görkəmli mütəxəssisləri – Azərbaycanın qədim və zəngin tarixini, dilini, ədəbiyyatını, folklorunu araşdıran Şərq təmayüllü türkoloq və şərqşünaslar, ədəbiyyat və dil tarixçiləri idi.
Qeyd edək ki, həmin illərdə yalnız milliyyətcə azərbaycanlı olanlar yox, Azərbaycan tarixi, ədəbiyyatı, mədəniyyətlə bağlı olan digər xalqların nümayəndələri də repressiyyaya məruz qalıblar.
Bütün xəbərlər Facebook səhifəmizdə
USD
EUR
GBP
RUB