Bu gün Standartlaşdırma, Metrologiya və Patent üzrə Dövlət Komitəsinin təşkilatçılığı ilə Ümumdünya Metrologiya gününə həsr olunan tədbir keçirilib. SİA-nın məlumatına görə, seminarda çıxış edən Komitənin Aparat rəhbərinin müavini Elçin Quliyev peşə bayramı münasibətilə ölkəmizin metroloqlarını təbrik edib, onlara uğurlar arzulayıb. Metrologiyanın əhəmiyyəti və aktuallığı barədə çıxış edən E.Quliyev ölkə rəhbərliyinin bu sahəyə xüsusi diqqət və qayğısını xüsusi vurğulayıb: "Belə ki, "Azərbaycan Respublikasının Standartlaşdırma, Metrologiya və Patent üzrə Dövlət Komitəsinin fəaliyyətinin təkmilləşdirilməsi ilə bağlı tədbirlər haqqında" Azərbaycan Respublikası Prezidentinin 4 aprel 2012-ci il tarixli Fərmanına əsasən Komitə yanında Texniki Tənzimləmə və Standartlaşdırma üzrə Dövlət Nəzarəti Xidməti, Dövlət Akkreditasiya Xidməti və Dövlət Metrologiya Xidmətinin yaradılması dövlətin bu sahəyə nə dərəcədə yüksək diqqət yetirməsinin bir daha sübutudur".
O, Standartlaşdırma, Metrologiya və Patent üzrə Dövlət Komitəsinin sədri Ramiz Həsənovun "20 may-Ümumdünya Metrologiya gününün qeyd olunması barədə" Əmrini oxuyaraq metrologiya sahəsində göstərdikləri xidmətlərə görə bir qrup Komitə əməkdaşlarının "Fəxri Fərman"la təltif olunduğunu qeyd edib. E.Quliyev təltif olunan əməkdaşlara "Fəxri Fərman"ları təqdim edərək onları təbrik edib.
Sonra Komitənin Metrologiya şöbəsinin müdiri Elçin Abbasov məruzə ilə çıxış edib. Bildirib ki, müasir dövrdə metrologiyanın - ölçmələr üzrə elmin insan fəaliyyətinin bütün sahələrində, dünya iqtisadiyyatının və elmi-texniki tərəqqinin inkişafında aparıcı rolu böyükdür. Bu günün tarixi 1875-ci ilin 20 mayından - Parisdə Beynəlxalq Diplomatik Konfransda 17 inkişaf etmiş ölkənin hökümət nümayəndələrinin məşhur Metrik Konvensiyasını imzalamaqla başlayıb. Konvensiyaya uyğun olaraq Beynəlxalq Kəmiyyət Ölçüləri və Çəkiləri Bürosu (BKÖÇB) yaradılıb və ölçmələr üzrə elm sahəsində beynəlxalq əməkdaşlığın əsasları və onun sənayedə, ticarətdə, cəmiyyətin mənafeyi naminə praktiki tətbiqi mexanizmləri işlənib hazırlanıb. Metrik Konvensiyası bütün ölkələrdə elmi-texniki tərəqqiyə təsir edib. Belə ki, məhz bu sənəddən sonra ölçmələrin metrik sistemi və beynəlxalq vahidlər sistemi tətbiq edilib və onun əsasında Beynəlxalq Ölçmələr Sistemi yaradılıb. Metrik Konvensiyanın ən başlıca məqsədi olan ölçmələrin vəhdətinin bütün ölkələrdə təmin edilməsi bu gün də çox vacib məsələdir.
Sonra Komitə yanında Dövlət Metrologiya Xidmətinin rəisi Oktay Abbasov Azərbaycanda metrologiyanın inkişaf problemləri haqqında danışıb. Bildirib ki, müəyyən edilmiş metroloji norma və qaydalara riayət edilməsi bu gün Azərbaycan dövlətinin diqqətində olan ən vacib məsələlərdəndir. Hazırda Azərbaycan Respublikası Prezidenti İlham Əliyevin apardığı uğurlu iqtisadi siyasətin nəticəsində ölkəmizin ixrac qabiliyyəti yüksəlib, yerli məhsulların beynəlxalq standartlara uyğunlaşdırılması işləri sürətlənib. Bütün bunlar isə metroloji təminatın inkişafından xəbər verir.
Bütün xəbərlər Facebook səhifəmizdə
USD
EUR
GBP
RUB