Bakı Şəhər Gənclər və İdman Baş İdarəsinin (BŞGİBİ) təşkilatçılığı ilə Müdafiə Nazirliyinin Cəmşid Naxçıvanski adına Hərbi Liseyində "Şahin" hərbi-idman oyununun Bakı şəhəri üzrə zona mərhələsi keçirilib. BŞGİBİ-nin mətbuat xidmətindən SİA-ya verilən xəbərə görə, oyundan əvvəl Azərbaycanın dövlət himni səslənib.
Yarışda paytaxtın 11 rayon komandası ilə yanaşı, Zəngilan, Şuşa və Laçın rayonlarının ümumtəhsil məktəblərindən komandalar birincilik uğrunda mübarizə aparıblar. Gənclər və İdman, Təhsil, Müdafiə və Fövqəladə Hallar nazirliklərinin nümayəndələrinin və məktəb şagirdlərinin valideynlərinin iştirak etdikləri tədbirdə BŞGİBİ-nin rəisi Raqif Abbasov, Gənclər və İdman Nazirliyinin sektor müdiri Əli Məmmədov, liseyin rəhbərliyi çıxış edərək gənc nəslin xalqa, dövlətə sədaqət ruhunda yetişməsində, onların mənəvi-psixoloji və fiziki hazırlığında, komanda düşüncə tərzinin təbliğində, vətənpərvərlik hisslərinin aşılanmasında, sabahın əsgər və zabitlərinin formalaşmasında ənənəvi "Şahinlər" hərbi-idman oyununun əhəmiyyətindən danışıblar.
Bildirilib ki, yarışın məqsədi yeniyetmələrin və gənclərin hərbi vətənpərvərlik tərbiyəsi işinin daha da gücləndirilməsi, orta məktəb şagirdlərini hərbi-idman oyunlarına geniş cəlb etməklə onların ordu sıralarında xidmətə hazırlanmasından ibarətdir. Natiqlər Azərbaycan Prezidenti, Silahlı Qüvvələrin Ali Baş Komandanı İlham Əliyevin ordu quruculuğuna xüsusi diqqət və qayğı göstərdiyini qeyd edib, dövlətimizin gənclər siyasətində hərbi-vətənpərvərlik sahəsinin mühüm yer tutduğunu vurğulayıblar. Diqqətə çatdırılıb ki dövlətimizin qayğısı nəticəsində ölkəmizdə istedadlı, çalışqan, vətənsevər, bacarıqlı gənclər yetişir. Onların inkişafı üçün dövlətimiz tərəfindən bütün imkanlar yaradılır. Daha sonra komandalar təntənəli marşla tribuna önündən keçiblər və onların sıra hazırlığı səviyyəsi yoxlanılıb. Yarışda "şahinlər" müxtəlif sınaqlardan keçməklə öz bacarıqlarını nümayiş etdiriblər. Yarışın nəticələrinə görə, I yeri Nərimanov rayonu, II yeri Nizami rayonu, III yeri isə Yasamal rayonu tutub. Yarışda ilk üç yeri tutan komandalar C. Naxçıvanski adına Hərbi Liseydə keçiriləcək respublika final mərhələsinə vəsiqə qazanıblar.
Bütün xəbərlər Facebook səhifəmizdə
USD
EUR
GBP
RUB