Qafqaz Müsəlmanları İdarəsinin (QMİ) sədri Şeyxülislam Hacı Allahşükür Paşazadə Vaşinqtonda keçirilən forumda çıxışı zamanı bəzi dinlərarası münasibətlərə gərginliyin gətirilməsi ilə bağlı məsələyə toxunub. Bu barədə SİA-ya QMİ-nin mətbuat xidmətindən məlumat verilib. Şeyxülislam ABŞ-da dinlərarası münasibətlərə gərginlik gətirildiyini və İslam haqqında yanlış təsəvvür yaradıldığını bildirib.
Onun sözlərinə görə, terror əməllərinə dini ideologiya donu geydirilməsi ikrah doğurur.
Müxtəlif ölkələrdə İslam dini haqqında məqsədyönlü şəkildə yanlış təsəvvür yaradıldığını dilə gətirən Allahşükür Paşazadə hətta İslamın terrorla eyniləşdirməyə cəhdlər edildiyini qeyd edib: " Halbuki kin, nifrət, zorakılıq və təcavüz dünya dinlərinin, o cümlədən İslamın müqəddəs hökmlərinə ziddir. Bütün problemlərin fövqündə duran sülh probleminin həm qlobal, həm də lokal miqyasda həllində dövlətlərin, ictimai və dini qurumların birgə əməkdaşlığı səmərəli nəticə verə bilər".
Çıxışı zamanı Dağlıq Qarabağ münaqişəsinə toxunan Şeyx vurğulayıb ki, Qafqaz regionunun həllini tapmayan problemlərindən biri də Azərbaycanın 20 ildən artıq üzləşdiyi - ərazisinin 20 faizinin erməni ekstremistləri tərəfindən işğal olunması və bir milyon insanın etnik təmizləmə siyasətinə məruz qaldığı Qarabağ münaqişəsidir: "İşğal olunmuş ərazilərimizdə müsəlman, xristian və yəhudi dini abidələri dağıdılıb. Bu isə dinlərarası qarşıdurma təhlükəsinə yol aça bilər. Zənnimcə, dünyada sülhün və əmin-amanlığın, cəmiyyətlərdə sağlam mənəvi-əxlaqi mühitin bərqərar olması və ənənəvi dəyərlərin qorunması məsələsində din xadimlərinin səylərinin birləşdirilməsi olduqca önəmlidir. Biz bəşərin qlobal bəlalardan xilası və insanlığın rifahı naminə birlik və tolerantlığımızı daima qoruyub saxlamalı, onu fəal şəkildə təşviq etməliyik".
Azərbaycanda dini tolerantlığa gəlincə QMİ sədri qeyd edib ki, Azərbaycan bütün səmavi dinlərin ardıcıllarının bir araya gəldiyi, qovuşduğu nadir məkanlardan biridir: "Mühüm mövqedə yerləşən Azərbaycanda müxtəlif etnik və dini icmalar arasında milli, irqi, dini ayrı-seçkiliyə heç bir zaman yol verilməyib, bütün xalqlar, müxtəlif dinlərə mənsub insanlar sülh və əmin-amanlıq şəraitində yaşayıblar. Azərbaycanda dövlət-din münasibətlərinin tənzimlənməsi, dini etiqad azadlığının təminatı, dini-mənəvi dəyərlərin qorunması, müsəlman, xristian, yəhudi və başqa dinlərə məxsus məbədlərin bərpası və təmiri sahəsində böyük uğurlara nail olunub. Azərbaycanda müxtəlif dini konfessiya rəhbərləri arasında səmimi qardaşlıq və səmərəli əməkdaşlıq mühiti hökm sürür və biz ölkəmizdəki pravoslav icmasının başçısı Arxiyepiskop Aleksandr, yəhudi icmasının başçısı Melih Yevdayev, katolik icmasının rəhbəri Vladimir Fekete ilə, hər zaman olduğu kimi, bu gün də bir yerdəyik".
Bütün xəbərlər Facebook səhifəmizdə
USD
EUR
GBP
RUB