ADU-da Sona Vəliyevanın yaradıcılıq gecəsi keçirilib

Bu gün Azərbaycan Dillər Universitetində (ADU) Azərbaycan Respublikası Milli Televiziya və Radio Şurasının (MTRŞ) üzvü, "Kaspi" Təhsil Mərkəzinin və "Kaspi" qəzetinin təsisçisi, şairə, filologiya üzrə fəlsəfə doktoru Sona Vəliyevanın yaradıcılıq gecəsi keçirilib. SİA-nın xəbərinə görə, ADU-nun Azərbaycan dili və ədəbiyyatı kafedrasının müdiri, professor Fəridə Səfiyevanın təşkilatçılığı ilə keçirilən tədbirdə Milli Məclisin deputatı, ADU-nun rektoru, professor Səməd Seyidov, Azərbaycan Yazıçılar Birliyinin və Azərbaycan Jurnalistlər Birliyinin üzvü Flora Xəlilzadə, jurnalist, şair-publisist Telli Pənahqızı, "Kaspi" qəzetinin baş redaktoru Natiq Məmmədli, "Olaylar" qəzetinin baş redaktoru Yunus Oğuz, universitetin professor-müəllim heyəti və tələbələr iştirak ediblər. Azərbaycan dili və ədəbiyyatı kafedrasının müdiri, professor Fəridə Səfiyeva çıxış edərək şairənin yaradıcılığı haqqında tədbir iştirakçılarına məlumat verib.

F.Səfiyeva "Kaspi" qəzeti və Kaspi Təhsil Mərkəzinin layihəsi əsasında İstanbulda "Hüseyn Cavid. Əsərləri" kitabının nəşr olunduğunu qeyd edib. O bildirib ki, hər bir oxucunun təsəvvüründə Sona Vəliyeva maarifçi, ziyalı, şair, alim, xalqını və ailəsini çox sevən bir qadın obrazı kimi canlanır.

Tədbirin təşkilatçısı Sona Vəliyevanın yaradıcılığının, elmi işlərinin və peşə fəaliyyətinin vahid bir sistem təşkil etdiyini və bu sistemin bütünlüklə Azərbaycan ideyasına xidmət etdiyini diqqətə çatdırıb. O, Sona xanımın Azərbaycançılıq ideologiyasının əsas tədqiqatçılarından və yorulmaz təbliğatçılarından olduğunu vurğulayıb. Kafedra müdiri söyləyib ki, onun "Azərbaycançılıq ideologiyasının təşəkkülü və tarixi inkişaf yolu" əsərinin Azərbaycançılığın təbliği sahəsində özünəməxsus rolu var.

Professor S.Vəliyevanın imzalar içində Azərbaycan türkünün də imzasının olması üçün böyük istedad və şücaət nümayiş etdirdiyini qeyd edib. F.Səfiyeva tədbirin təşkilində dəstəyinə görə ADU-nun rektoru, Milli Məclisin deputatı, professor Səməd Seyidova təşəkkürünü bildirib. Yaradıcılıq gecəsində şairənin həyat və yaradıcılığından bəhs edən videoçarx nümayiş olunub. Onun özü və əsərləri haqqında qələm yoldaşlarının dediyi fikirlər səslənib. Filologiya və jurnalistika fakültəsinin I-III kurs tələbələrinin iştirakı ilə keçirilən yaradıcılıq gecəsində bildirilib ki, Sona Vəliyeva şeiri ictimai hadisə sayır. Qeyd olunub ki, onun heç bir şeiri millətin taleyindən, zamanın gətirdiyi dərdlərdən kənar deyil.

Tədbirdə vurğulanıb ki, şairənin "Arazbarı" kitabı öz ruhunu, iç dünyasını əks etdirir. Sona xanımın yaradıcılığında rənglərə verilən qiymətdən söz açılıb. Qeyd olunub ki, Azərbaycanın parçalanması, Güney - Quzey ayrılığı, Qarabağ ağrısı Sona Vəliyevanın yaradıcılığında ana xətt kimi keçir. Yaradıcılıq gecəsində tələbələr şairənin "Qərib payız", "Tənha sarı yarpaq", "Yarpaq-yarpaq", "Quruyan ərik ağacı", "Ata evim", "Bir ana köçünə çatmamışam mən", "Salam, ata", "Ehtiyac", "Anamın əlləri", "Gəl sənə həzin bir şeir oxuyum", "Bu yağış mənə bənzəyir", "Yaman uzandı bu yaz yağışı", "Səni sevdim, Allahım", "Bu nə eşq sevdası, necə möcüzə", "Yollara yağış yağır", "Narın yağış", "Biraz günəş göndər", "Səni yola saldım", "Vallah gözə gəldi bu ilahi eşq", "Sənsiz keçən bir günüm", "İlləri əl-ələ verib gəlmişik", "Gəl gedək bu şəhərdən", "Sarı gözəl, sarı çiçək", "Bir az möhlət ver Allah" , "Arazbarı", "Ay Qaragilə", "Öncə can sağlığı deyən şəxslərə" şeirlərini söylədilər. Tədbirdə həmçinin şairənin sözlərinə bəstələnmiş mahnılar səslənib, ədəbi-bədii kompozisiya nümayiş olunub. Sonra "Cəngi" mahnısının sədaları altında Azərbaycan bayrağı meydana gətirilib.

Sonda Azərbaycan Respublikası Milli Televiziya və Radio Şurasının üzvü, "Kaspi" Təhsil Mərkəzinin və "Kaspi" qəzetinin təsisçisi, şairə Sona Vəliyeva çıxış edərək tədbirin təşkilində əməyi keçənlərə minnətdarlığını bildirib. S.Vəliyeva ADU-nun onun yaradıcılığına böyük qiymət verərərək belə görüşü təşkil etdiyindən məmnunluğunu ifadə edib.

Söz yaradıcılığından danışan S.Vəliyeva bildirib ki, Azərbaycan xalqı özünə məxsus dilini və mədəniyyətini bütün assimilyasiya basqılarından qoruyaraq bu günə kimi yaşada bilib. Şairə qeyd edib ki, dil millətin var olmasında ən mühüm ünsürdür. O, Azərbaycançılıq məfkurəsinin inkişaf etdirilməsində hər bir insanın üzərinə məsuliyyət düşdüyünü deyib və yaddaşın millətin, xalqın formalaşmasında önəmli rol oynadığını vurğulayıb. S.Vəliyeva Azərbaycan dilinin inkişafının, Azərbaycançılıq ideyasının müstəqillik dönəmindən sonra Ümummilli Lider Heydər Əliyev tərəfindən daha da inkişaf etdirilərək yalnız Azərbaycan Respublikasının deyil, bütün dünya azərbaycanlılarının ideologiyası səviyyəsinə yüksəldiyini diqqətə çatdırıb.

S.Vəliyeva ADU-nun rektoru Səməd Seyidova tədbirin yüksək səviyyədə təşkilinə görə minnətdarlığını bildirib.