Keçmiş Qəbələ RLS-in əmlakı və ərazisi Azərbaycan Silahlı Qüvvələrinin balansına yox, Nazirlər Kabinetinin qərarı ilə müvafiq qurumlara həvalə olunub. SİA-nın xəbərinə görə, bu barədə Müdafiə Nazirliyinin mətbuat xidmətinin rəhbəri polkovnik-leytenant Vaqif Dərgahlı məlumat verib.
O bildirib ki, "Azərbaycan Respublikası Hökuməti və Rusiya Federasiyası Hökuməti arasında Qəbələ RLS-in statusu, istifadə prinsipləri və şərtləri haqqında Saziş"in 9 dekabr 2012-ci il tarixindən qüvvədən düşməsi ilə bağlı Rusiya Federasiyası tərəfindən stansiyanın istismarının 10 dekabr 2012-ci il tarixindən etibarən dayandırılması barədə Azərbaycan tərəfinə Nota təqdim edilib. Stansiyanın fəaliyyəti həmin tarixdən tam dayandırılıb.
Onun sözlərinə görə, Azərbaycan Respublikasının Nazirlər Kabinetinin 11 dekabr 2012-ci il tarixli sərəncamı ilə Qəbələ radiolokasiya stansiyasının (RLS "Daryal") bağlanılması ilə əlaqədar tədbirlərin həyata keçirilməsi üzrə Komissiyanın tərkibi müəyyən edilib və aidiyyətli dövlət orqanları bu Komissiyanın işindən irəli gələn vəzifələrin həyata keçirilməsi ilə bağlı məsələləri həll ediblər: "Qəbələ RLS-in təhvil-təslimi üçün yaradılmış dövlət komissiyası qarşıya qoyulan bütün məsələləri tam başa çatdırıb. Keçmiş Qəbələ RLS-in əmlakının və ərazisinin gələcəkdə istifadəsi Nazirlər Kabinetinin qərarı ilə müvafiq qurumlara həvalə olunub".
Qeyd edək ki, Qəbələ RLS-in Əmlak Məsələləri üzrə Dövlət Komitəsinin balansına keçirilməsi ilə bağlı məlumatı dəqiqləşdirmək üçün komitə ilə əlaqə saxlamağa çalışsaq da cəhdimiz boşa çıxdı. Zənglərimiz komitə tərəfindən cavablandırılmadı.
Bütün xəbərlər Facebook səhifəmizdə
USD
EUR
GBP
RUB