Azərbaycan Respublikasının Prezidenti yanında Dövlət Dəstəyi Şurasının Apelyasiya Komissiyasının iclası keçirilib. Şuradan SİA-ya verilən xəbərə görə, Şura üzvü Sahib Məmmədovun sədrliyi ilə keçirilən iclasda 2014-cü il birinci maliyyə müsabiqəsinin nəticələri ilə razılaşmayan 4 QHT-nin şikayətinə baxılıb.
Komissiya üzvləri – Şura Katibliyinin icraçı direktoru Fərasət Qurbanov, Şura üzvü Vüqar Qədirov, Hüquqi Düşüncə İctimai Birliyinin sədri Samir İsayev və Katibliyin baş məsləhətçisi Fərid Rüstəmov müsabiqə nəticələri ilə bağlı müraciət edib 5 təşkilatdan 4-nün təqdim etdiyi layihələrlə əvvəlcədən tanış olduqlarını bildiriblər.
Apelyasiya komissiyasına müraciət edən 5 təşkilatdan 4-ü iclasda iştirak etmiş və onların şikayətinə baxılıb. Onlar aşağıdakılardır:
1. Sosial İqtisadi Araşdırmalar İctimai Birliyi
2. Milli Paralimpiya Komitəsi
3. Şəmsi Əsədullayev Xeyriyyə İctimai Birliyi
4. Əlillərin Sosial Problemlərinə Yardım İctimai Birliyi
Qarşılıqlı anlaşma və diskussiya şəraitində keçən müzakirələrdə komissiyaya təqdim olunan hər bir layihə yenidən nəzərdən keçirilərək onların hazırlanmasında yol verilən nöqsanlar QHT rəhbərlərinin nəzərinə çatdırılıb.
Komissiya üzvləri hər bir şikayət üzrə ayrılıqda qərar qəbul ediblər. Milli Paralimpiya Komitəsinin təqdim etdiyi layihənin ideyasının əhəmiyyətini nəzərə alaraq mövcud çatışmazlıqları aradan qaldırmaqla Şuranın növbəti maliyyə yardımı müsabiqəsinə təqdim etməsi tövsiyə edilib. Digər 3 QHT-nin təqdim etdiyi layihələrin maliyyələşdirilməməsi haqqında Şuranın qərarı isə qüvvədə saxlanılıb.
Komissiya üzvləri layihələr üzrə yerinə yetiriləcək fəaliyyətlərin ictimai baxımdan aktual və konkret olmasının vacibliyini QHT nümayəndələrinin diqqətinə çatdırıblar. İclasda Şura tərəfindən layihələrin qiymətləndirilməsində şəffaflığın təmin olunması üçün mütamadi iş aparıldığı da vurğulanıb.
Bütün xəbərlər Facebook səhifəmizdə
USD
EUR
GBP
RUB