Azərbaycan Milli Elmlər Akademiyası (AMEA) Fizika İnstitutunda elmi şuranın iclası keçirilib. SİA-nın xəbərinə görə, tədbiri açan institutun elmi işlər üzrə direktor müavini, müxbir üzv Cavad Abidinov AMEA Rəyasət Heyətinin 20 Yanvar faciəsinin 24-cü il dönümünə həsr olunan xatirə tədbirlərinin keçirilməsinə dair sərəncamı haqqında məlumat verib.
O, çıxışında həmin illərdə baş verən hadisələr haqqında danışıb: "1980-ci illərin axırlarında keçmiş Sovet İttifaqında gedən proseslər, ölkə rəhbərliyinin uğursuz "yenidənqurma" siyasəti, milli siyasət sahəsində buraxılan kobud səhvlər bütün respublikalarda olduğu kimi, Azərbaycanda da milli-azadlıq hərəkatının geniş vüsət almasına səbəb olub".
C.Abidinov həmin illərdə Azərbaycanda ictimai-siyasi vəziyyətin kəskinləşməsinin əsas səbəblərindən biri də Ermənistanın Azərbaycana qarşı ərazi iddiaları ilə çıxış etməsi, uydurma "Dağlıq Qarabağ" probleminin ortaya atılması ilə bağlı olduğunu söyləyib: "Ölkədə kütləvi iğtişaşların qarşısını almaq bəhanəsi ilə SSRİ rəhbərliyi 1990-cı ilin yanvar ayında Bakıya qoşun hissələri yeritməyə başladı. Yanvarın 19-da axşam Azərbaycan televiziyasının enerji bloku partladıldı".
Cavad Abidinov həmin gecə Bakının müxtəlif rayonlarında sovet əsgərləri tərəfindən 121 insanın qətlə yetirildiyini, 700-dən artıq vətəndaşın yaralandığını vurğulayıb: "Həlak olanların arasında 4 milis işçisi, 1 həkim, 1 aspirant, 3 elmlər doktoru olub".
O, həmçinin o zaman Moskvada yaşayan ümummilli lider Heydər Əliyevin heç bir təhlükəyə baxmayaraq, yanvarın 21-də Azərbaycanın Moskvadakı daimi nümayəndəliyinə gəlməsi, mətbuat konfransı keçirməsi və Kommunist Partiyası sıralarından çıxmasından bəhs edib.
Tədbirin sonunda 20 Yanvar şəhidlərinin xatirəsi bir dəqiqəlik sükutla yad edilib.
Bütün xəbərlər Facebook səhifəmizdə
USD
EUR
GBP
RUB