"Azərbaycan piratçılığa qarşı beynəlxalq səviyyədə mübarizənin fəal iştirakçılarından biridir. Piratçılığın səviyyəsinin azalması istiqamətində görülən tədbirlər nəticəsində ölkədə piratçılığın səviyyəsi 2005-ci illə müqayisədə kitab nəşri sahəsində 61 faizdən 30 faizə, audio-video məhsul bazarında 90 faizdən 68 faizə, proqram təminatında 96 faizdən 87 faizə düşüb". SİA-nın məlumatına görə, bunu Müəllif hüquqları Agentliyinin sədri Kamran İmanov deyib.
Onun sözlərinə görə, müəlliflərin, digər hüquq sahiblərinin, aspirantların, ictimai birliklərin və müəllif-hüquq məsələləri ilə maraqlanan bütün şəxslərin sorğularını operativ şəkildə cavablandırmaq və Agentliyin səlahiyyətləri çərçivəsində müvafiq köməkliyin göstərilməsini sürətləndirmək məqsədi ilə 960 nömrəli "Qaynar xətt" açılıb: "Agentlikdə fəaliyyət göstərən "Qaynar xətt"ə 2013-cü ilin ötən dövrü ərzində 600-dən çox müraciət daxil olub. Müraciətlərin hər biri üzrə müvafiq tədbirlər görülüb".
Agentliyin sədri onu da qeyd edib ki, "Azərbaycan modeli" gələcəkdə yeni uğurlara zəmin yaradan, İKT-nin inkişafına əsaslanan modeldir: "Dövlət başçısının həyata keçirdiyi siyasət əqli mülkiyyətin inkişafına da güclü təsir göstərir. "Azərbaycan 2020 : gələcəyə baxış" inkişaf konsepsiyasında bu sahənin prioritet istiqamətlərdən biri kimi qəbul edilib".
"Agentliyin araşdırmaları nəticəsində məlum olub ki, son 10 ildə müəlliflik hüququ və əlaqəli hüquqlara əsaslanan "kreativ iqtisadiyyatın" ÜDM-dəki payı 2003-cü ildəki 2,1 faizdən 2012-ci ildə 4,5 faizə çatıb və hazırda inkişaf edən ölkələr səviyyəsindədir. Əqli mülkiyyətin qorunmasında Azərbaycan institutları dünyada 69-cu yeri tutaraq Qazaxıstanı 4 pillə, Rusiyanı 44 pillə, Ukraynanı isə 64 pillə üstələyir. Ümumiyyətlə, son illərin hesabatlarında Azərbaycan əqli mülkiyyət sahəsində Cənubi Qafqazda ən qabaqcıl dövlət kimi təqdim olunur" - deyə, Agentliyin sədri fikirlərinə əlavə edib.
Bütün xəbərlər Facebook səhifəmizdə
USD
EUR
GBP
RUB