Ədliyyə naziri Fikrət Məmmədovun sədrliyi ilə nazirliyin kollegiya iclası keçirilib.
İclasda Azərbaycan Prezidenti İlham Əliyevin "Qeyri-hökumət təşkilatlarına elektron xidmətlərin göstərilməsinin təkmilləşdirilməsi ilə bağlı tədbirlər haqqında" 2013-cü il 20 noyabr tarixli Fərmanından irəli gələn vəzifələr müzakirə olunub.
Tədbirdə çıxış edən nazir son illər Prezident İlham Əliyevin rəhbərliyi ilə respublikamızın sürətli sosial-iqtisadi tərəqqisini, vətəndaş cəmiyyətinin inkişafı üçün əlverişli şəraitin yaradılmasını, qeyri-hökumət təşkilatlarına (QHT) dövlət dəstəyinin artırılmasını, qanunvericilik və institusional tədbirləri, o cümlədən QHT-lərə dövlət dəstəyi konsepsiyasının qəbul olunmasını, bu sahədə milli donor institutunun - Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının yaradılmasını qeyd edib. Bundan əlavə, Prezident İlham Əliyevin 2012-ci il 29 noyabr tarixli Fərmanı ilə təsdiq edilmiş "Azərbaycan 2020: gələcəyə baxış" İnkişaf Konsepsiyasında da QHT sektorunun inkişafına dair bir çox tədbirlər müəyyən olunub. Bildirib ki, qeyri-hökumət təşkilatlarının sayının ilbəil artması davam edib, nazirlikdə dövlət qeydiyyatına alınmış QHT-lərin sayı 2.900-ü ötüb, təkcə bu ilin 11 ayı ərzində 51 milyon manatdan çox məbləği əhatə edən 1230 qrant müqaviləsi qeydiyyata alınıb.
Nazir QHT-lərə elektron xidmətlərin göstərilməsinin təkmilləşdirilməsi və görülən işlərin səmərəliliyinin artırılması üçün daha qətiyyətli addımların atılmasında dövlətimizin başçısının qeyd olunan Fərmanının müstəsna əhəmiyyətini və qarşıda duran mühüm vəzifələri xüsusi vurğulayıb.
İclasda çıxış edən nazirliyin qeydiyyat və notariat baş idarəsinin rəisi İlqar Məmmədov "Qeyri-kommersiya hüquqi şəxsləri" avtomatlaşdırılmış qeydiyyat informasiya sisteminin, nazirlik tərəfindən göstərilən elektron xidmətlər sırasında qeyri-hökumət təşkilatlarının və digər qeyri-kommersiya hüquqi şəxslərin qeydiyyatı proseduru, eləcə də onların dövlət reyestrinə daxil edilməsi ilə bağlı məlumatın verilməsinə dair yeni işlək funksiyaların yaradıldığını qeyd edib. Həmçinin qeyri-hökumət təşkilatlarına daim metodiki köməklik göstərilərək tövsiyə və məsləhətlər verilir, əyani vəsaitlər təqdim olunur.
Bununla belə, bəzi qeyri-hökumət təşkilatlarının nizamnamələrinə uyğun fəaliyyət göstərməmələri, qrant müqavilələri və digər zəruri məlumatları təqdim etməmələri, maliyyə pozuntuları və bu kimi hallara yol vermələri, eləcə də qeydiyyatla bağlı sənədlərin bəzi hallarda natamam və qüsurlu təqdim olunması bildirilib.
Qeyd olunub ki, yeni Fərmana əsasən, qeyri-hökumət təşkilatlarının aidiyyəti dövlət qurumları ilə qarşılıqlı məlumat mübadiləsini, qanunla müəyyən edilmiş məlumatların, hesabatların elektron formada verilməsini və digər elektron xidmətlərin həyata keçirilməsini təmin etmək məqsədilə Ədliyyə Nazirliyinə "Fərdi elektron pəncərə" elektron məlumat sistemi yaradılması və fəaliyyətinin təmin edilməsi tapşırılıb.
Bununla əlaqədar Azərbaycan Prezidenti İlham Əliyevin Fərmanının icrası üzrə görülməli işlər əyani nümayiş etdirilib, elektron məlumat sistemindən istifadəni təmin etmək üçün zəruri infrastrukturun formalaşdırılması, istifadə qaydalarına dair inzibati reqlamentin hazırlanması, müasir informasiya-kommunikasiya texnologiyalarının tətbiqi imkanları və s. məsələlər üzrə konkret tədbirlər müəyyən olunub.
İclasda, həmçinin qeyd edilib ki, son illər ölkədə baş verən mütərəqqi sosial-iqtisadi dəyişikliklər, əhalinin rifahının günbəgün yüksəlməsi demoqrafik inkişafa, doğum və nikahın sayının artmasına ciddi təsir göstərib, eyni zamanda, dövlətimizin başçısının təşəbbüsü ilə yaradılmış "ASAN xidmət" mərkəzlərində vətəndaşlıq vəziyyəti aktlarının qeydiyyatının aparılması da qeydiyyat orqanlarının qanunvericilik əsaslarının və işinin daha da təkmilləşdirilməsini şərtləndirib. Bununla əlaqədar qeydiyyat şöbələrinin və nikah evlərinin fəaliyyətini tənzimləyən normativ-hüquqi akt layihəsi müzakirə olunaraq qəbul olunub.
Kollegiyada kadr işinin təkmilləşdirilməsi, o cümlədən gənc mütəxəssislərin qulluğa qəbulu prosesinin daha da yaxşılaşdırılması, onların səmərəli tədrisi və peşə vərdişlərinə mükəmməl yiyələnməsi ilə bağlı aidiyyəti tapşırıqlar verilib, bir sıra qeyri-kommersiya hüquqi şəxslər dövlət qeydiyyatına alınıb.
Bütün xəbərlər Facebook səhifəmizdə
USD
EUR
GBP
RUB