AzərTAc-ın Tehran nümayəndəliyinin himayədarlığı ilə dünya şöhrətli şair-dramaturq Hüseyn Cavidin "Peyğəmbər" əsəri İranda ərəb qrafikalı əlifba ilə Azərbaycan dilində və farsca nəşr olunub. Tədqiqatçı Əkbər Əliyarın tərcümə etdiyi kitab Qum şəhərində fəaliyyət göstərən "Avayi -münci" nəşriyyatında çapdan çıxıb. Tərcüməçinin Azərbaycan və fars dillərini mükəmməl bilməsi, zəngin dünyagörüşü, Azərbaycan ədəbiyyatına sonsuz marağı Hüseyn Cavidin fikir və düşüncələrinin farsdilli oxucuya bütün incəliyi ilə çatdırılmasına imkan verib.
Nəfis tərtibatda nəşr edilmiş 302 səhifəlik kitabda tərcüməçinin "Peyğəmbər" əsəri barədə fikir və düşüncələri də yer alıb. Bu əsərə müraciət etməsinin səbəblərini açıqlayan Əkbər Əliyarın yazır ki, Hüseyn Cavid dünya ədəbi mühitində təkrarolunmaz simadır, nadir yaradıcılıq üslubuna malik şairdir. Hüseyn Cavid yaradıcılığı ilə bağlı aparılan elmi tədqiqatların mühüm məqamları, şairin həyatının maraqlı anlarını əks etdirən nadir fotolar kitaba əlavə rəng qatıb.
Qeyd edək ki, "Peyğəmbər" böyük şairimizin fars dilinə tərcümə edilib kitab şəkilində nəşr olunan ilk əsəridir.
Sabir Şahtaxtı
AzərTAc-ın xüsusi müxbiri
Tehran
Bütün xəbərlər Facebook səhifəmizdə
USD
EUR
GBP
RUB