Bu gün Rumıniyanın paytaxtı Buxarest şəhərində Azərbaycan Respublikasının Prezidenti yanında Gənclər Fondunun maliyyə, Azərbaycan-Rumıniya Ticarət Palatasının təşkilati dəstəyilə "Gənclərin İqtisadi, Sosial və Mənəvi İnkişafına Yardım" İctimai Birliyi tərəfindən Azərbaycan uşaqlarının rəsm sərgisinin açılış mərasimi keçirilib.
SİA-ya verilən məlumata görə, Rumıniya Milli Kitabxanasında baş tutan sərgini giriş sözü ilə Heydər Əliyev Fondunun Rumıniyadakı nümayəndəliyinin rəhbəri İqbal Hacıyev açıb və sərginin əhəmiyyətindən danışıb.
Açılış mərasimində iştirak edən Prezident Administrasiyasının ictimai-siyasi məsələlər şöbəsinin məsul əməkdaşı Vüsal Quliyev, Azərbaycanda fəaliyyət göstərən gənclər təşkilatlarının ölkəmizdən kənarda dövlətçiliyimizin inkişafına yönəlik müxtəlif tədbirlərin təşkil etməsini yüksək qiymətləndirib. O, bildirib ki, bütün bunlar ölkə başçısı cənab İlham Əliyevin gənclərə və gənclər təşkilatlarına göstərdiyi etimadın nəticəsidir: "Azərbaycan Gənclər Fondunun da öz növbəsində belə layihələri dəstəkləməsi təqdirəlayiqdir".
Layihənin koordinatoru, Azərbaycan-Rumıniya Ticarət Palatasının sədri Şahin Nəbiyev Rumıniyada yalnız ticarət layihələri deyil, müxtəlif sosial layihələrə də dəstək verəcəklərini qeyd edib.
Tədbirdə Rumıniya parlamentinin deputatları, Azərbaycanın Rumıniyadakı səfirliyinin, Heydər Əliyev Fondunun Rumıniya nümayəndəliyinin, Rumıniya-Azərbaycan Dostluq Cəmiyyətinin, Azərbaycan-Rumıniya Mədəniyyət və Gənclər Assosiasiyasının, Rumıniya-Azərbaycan Sənaye və Ticarət Palatasının əməkdaşları, Rumıniyanın elm və ictimaiyyət nümayəndələri, tələbələr, KİV və yerli QHT-lər iştirak ediblər.
Qeyd edək ki, 3 gün davam edəcək sərgidə məcburi köçkün uşaqlarla yanaşı, T.İsmayılov və Nizami adına Uşaq-Gənclər Yaradıcılıq Mərkəzlərinin, Respublika İncəsənət Gimnaziyasının Uşaq-Gənclər Yaradıcılıq Mərkəzinin, Bakı şəhər gənc turistlər və diyarşünaslıq mərkəzinin şagirdlərinin çəkdiyi rəsmlər nümayiş etdirilir.
.jpg)
Bütün xəbərlər Facebook səhifəmizdə
USD
EUR
GBP
RUB