Aprel ayının 5-6-da Bakıda Ətraf Mühitin Mühafizəsi VII Beynəlxalq Layihə Olimpiadası (İNEPO) keçiriləcək. SİA-nın məlumatına görə, bu gün keçirilən mətbuat konfransında Azərbaycan - Türkiyə Özəl Liseyləri Baş İdarəsinin rəisi Məsut Kurnaz deyib ki, beynəlxalq olimpiada Təhsil Nazirliyi, İDEA, Ekologiya və Təbii Sərvətlər Nazirliyi, Azərbaycan Respublikası Dövlət Neft Şirkəti, İctimai Televiziya və Radio Yayımları Şirkəti, "Çağ Öyrətim" İşlətmələri Şirkəti və "İnepo-Avrasiya" Ekologiya İctimai Birliyinin təşkilatçılığı ilə baş tutacaq. O bildirib ki, olimpiadanın keçirilməsi Azərbaycanda və dünyada artmaqda olan ekoloji problemlərin həlli və ətraf mühitin qorunub saxlanılması mövzusunda gənc nəsli bilikləndirmək, təbii, mədəni, tarixi və sosial estetik dəyərləri qorumaq və digər məqsədlər daşıyır: "Bu il VII "İnepo Avrasiya" Ekologiya Olimpiadasında 45 ölkədən 500-ə yaxın iştirakçı yarışacaq. 2013-cü ildə Azərbaycanla yanaşı 45 xarici ölkədən 625 layihədən 22-si, Azərbaycanda isə 180 orta məktəbdən 214 layihə təqdim olunub ki, onlardan 78-si növbəti mərhələyə keçib".
"Çağ Öyrətim" İşlətmələri Şirkətinin İdarə Heyətinin sədri Ənvər Özərən deyib ki, oimpiada dünyada Türkiyədən sonra Azərbaycanda keçirilir: "Bu gün dünyada ekologiya sahəsində mövcud olan problemlər və onların həlli daima müzakirə olunan əsas məsələlərdən biridir. Sənaye və texnologiya inkişaf etdikdə onun yaratdığı problemlərə qarşı qabaqlayıcı tədbirlər görülməlidir. Bu gün xəstəliklər dünənə nisbətən daha oxdur. Buna qarşı tədbirlərin görülməsi, ətraf mühitin qorunması hər ötən gün aktuallığını artırır. Azərbaycanda da hər kəs buna özünəməxsus formada layiqli töhfələr verməyə çalışırlar. Ətraf Mühitin Mühafizəsi VII Beynəlxalq Layihə Olimpiadası da şagirdləri ətraf mühitin qorunması sahəsində lazımi işlər görməyə təkan verir".
Xatırladaq ki, 2012-ci ildə keçirilən olimpiadaya 42 ölkədən 250-dən artıq iştirakçı qatılıb. Azərbaycan məktəblərində 200-dən artıq layihə arasında 70 layihə, xarici ölkələrdən isə 48 layihə seçilib.
Bütün xəbərlər Facebook səhifəmizdə
USD
EUR
GBP
RUB