Bu gün Daxili İşlər Nazirliyində (DİN) Xocalıda şəhid olmuş polis əməkdaşlarının ailə üzvlərinin iştirakı ilə anım mərasimi keçirilib. DİN-dən SİA-ya verilən məlumata görə, tədbiri giriş sözü ilə daxili işlər nazirinin müavini, polis general-leytenantı Əsgər Ələkbərov açıb. O bildirib ki, 1992-ci il fevralın 25-dən 26-na keçən gecə təpədən-dırnağadək silahlanmış erməni silahlı dəstələri 366-cı motoatıcı alayın şəxsi heyətinin və ağır texnikasının köməyi ilə mühasirədə olan Xocalını işğal edib. Həmin gecə şəhər əhalisindən 613 nəfər öldürülmüş, 487 nəfər şikəst olmuş, 1275 nəfər - qocalar, uşaqlar, qadınlar girov götürülərək ağlasığmaz zülmlərə, təhqir və həqarətlərə məruz qalmışlar. 150 nəfərin taleyi hələ də məlum deyil. Ozamankı respublika rəhbərliyi dinc vətəndaşların təhlükəsizliyini qorumaq, qanlı hadisələrin qarşısını almaq, faciənin miqyasını azaltmaq üçün heç nə etməmişdir.
Yalnız xalqın təkidi, tələbilə hakimiyyətə qayıdan Ulu öndər Heydər Əliyevin prinsipial mövqeyi sayəsində xalqımıza qarşı törədilən soyqırımına obyektiv hüquqi-siyasi qiymət verilib. Milli Məclisin 24 fevral 1994-cü il tarixli qərarı ilə 26 fevral "Xocalı soyqırımı günü" elan olunmuş, 1997-ci il fevralın 25-də "Xocalı soyqırımı qurbanlarının xatirəsinə sükut dəqiqəsi elan edilməsi haqqında" sərəncam imzalanıb.
Xocalının müdafiəsi zamanı düşmənlə qeyri-bərabər döyüşlərdə 17 polis əməkdaşının da qəhrəmancasına həlak olduğunu xatırladan nazir müavininin təklifi ilə soyqırıma məruz qalmış xocalıların, eləcə də ərazi bütövlüyümüz və suverenliyimiz uğurunda canlarından keçmiş soydaşlarımızın əziz xatirəsi bir dəqiqəlik sükutla yad edilib.
Xocalı soyqırımının insanlığa qarşı törədilmiş ən dəhşətli faciələrlə bir sırada durduğunu deyən Ə.Ələkbərov tədbir iştirakçılarının diqqətinə çatdırıb ki, işğaldan sonra bütün maddi mədəniyyət abidələrinin vəhşicəsinə dağıdılması bəşər mədəniyyətinə, sivilizasiyasına, insan haqlarına qarşı törədilmiş qatı cinayətdir.
Ölkə Prezidenti cənab İlham Əliyevin tapşırığı ilə bu faciənin bütün dünyada tanınması istiqamətində görülən işləri, Heydər Əliyev Fondunun dəstəyi ilə Azərbaycan həqiqətlərinin dünyanın hər yerində yayılmasını, beynəlxalq aləmin məlumatlandırılmasını, Ermənistanın torpaqlarımızı işğal etməsi faktı və Xocalı soyqırımı ilə bağlı iki yüz mindən artılq həmvətənimizin, o cümlədən daxili işlər orqanları əməkdaşlarının da "Ağ Ev"in saytındakı petisiyaya səs verdiyini, prosedur qaydalarına uyğun olaraq, ABŞ Prezidentinin hər iki məsələylə əlaqədar bəyanatla çıxış edəcəyini diqqətə çatdıran nazir müavini Əsgər Ələkbərov vurğulayıb ki, artıq yalan və saxtakarlıq üzərində qurulmuş erməni təbliğatının iç üzü ifşa olunub. Dünya ictimai fikri Xocalı həqiqətlərini qəbul etməyə başlayır. Artıq Pakistan, Meksika, Kolumbiya, Rumıniya və digər ölkələrin parlamentləri tərəfindən Xocalıda baş verən kütləvi qətliam soyqrımı kimi tanınmış, ABŞ-ın 6 ştatının qanunverici orqanları da analoji addımı atıb.
Polis general-leytenantı Əsgər Ələkbərov nazir, general-polkovnik Ramil Usubovun adından bu qəhrəman şəhərin müdafiəsində şəhid olmuş polis əməkdaşlarının ailə üzvlərinə bir daha başsağlığı verib, onların problemləri və qayğıları ilə maraqlanıb, qaldırılan məsələlərin tezliklə həlli istiqamətində müvafiq tədbirlərin görüləcəyini bildirib.
Xocalının müdafiəsi zamanı şəhid olmuş polis əməkdaşlarının ailələri adından danışan Vərziyar Əliyeva və Tacirə Xəlilova onlara göstərilən diqqət, qayğıya görə ölkə rəhbərliyinə minnətdarlıq edib, Azərbaycan Prezidentinin apardığı məqsədyönlü daxili və xarici siyasətin nəticəsində doğma yurd yerlərinə qayıdacaqlarına ümidvar olduqlarını bildirib.
Nazir müavini bu gün Azərbaycanın bölgədə həlledici söz sahibinə çevrildiyini, BMT Təhlükəsizlik Şurasının üzvü kimi dünyada gedən mühüm proseslərlə bağlı öz prinsipial mövqeyini ortaya qoyduğunu, problemin ədalət və beynəlxalq hüquq normaları çərçivəsində həllinə əminliyini bildirib, eyni zamanda, iqtisadi potensialımızın, siyasi və hərbi qüdrətimizin durmadan artdığını xatırladaraq xalqımızın iradəsinə və ordumuzun gücünə arxalanan dövlətimizin öz ərazi bütövlüyünü istənilən yolla bərpa edəcəyi barədə möhtərəm dövlət başçımızın qətiyyətli mövqeyini bir daha diqqətə çatdırıb.
Bütün xəbərlər Facebook səhifəmizdə
USD
EUR
GBP
RUB