İclasda Azərbaycanı OANA-nın İcraiyyə Komitəsinin büro üzvü olan AzərTAc-ın baş direktoru təmsil edib
Bu gün Tokioda Yaponiyanın Kyodo informasiya agentliyinin təşkilatçılığı ilə Asiya və Sakit Okean Ölkələri İnformasiya Agentlikləri Təşkilatının (OANA) İcraiyyə Komitəsinin 34-cü iclası keçirilib.
İclasda OANA İcraiyyə Komitəsinin üzvü olan 12 ölkənin, o cümlədən Rusiyanın İTAR-TASS, Türkiyənin Anadolu, Azərbaycanın AzərTAc, Çinin Sinxua, Yaponiyanın Kyodo, Koreya Respublikasının Yonhap, Malayziyanın Bernama, İndoneziyanın ANTARA milli informasiya agentliklərinin rəhbərləri iştirak ediblər.
OANA-nın prezidenti, Anadolu Agentliyinin baş direktoru Kamal Öztürk və Kyodo informasiya agentliyinin prezidenti Satoşi İşikava iclasın iştirakçılarını salamlayıb, təşkilatın işinin daha da təkmilləşdirilməsi, informasiyanın cəmiyyətdə rolunun artdığı indiki şəraitdə qurumun fəaliyyətinin gücləndirilməsi istiqamətində qarşıda duran vəzifələrdən danışıblar. Region ölkələri arasında informasiya mübadiləsində OANA-nın rolu, dünya informasiya məkanında təşkilatın yeri, qlobal çağırışlar və digər məsələlər müzakirələrin əsas mövzusu olub.
OANA-nın baş katibi Ərcan Göçər 33-cü iclasdan keçən dövrdə qurumun internet saytına artan maraqdan danışıb, bu elektron resursa informasiya göndərən ən fəal üzv agentliklər sırasında AzərTAc-ın adını xüsusi vurğulayıb. Baş katib bildirib ki, OANA-nın internet səhifəsi həm dizayn, həm də dinamiklik baxımından yenilənib ki, bu da onun təkcə regionda deyil, dünyada istifadəçilərinin sayının sürətlə artması ilə nəticələnib. Əlbəttə, bu, qurumun üzvü olan ölkələrin milli agentliklərinin xəbərlərinə dünyada artan marağın göstəricisidir.
AzərTAc-ın baş direktoru Aslan Aslanov iclasda çıxış edib. Bildirilib ki, Azərbaycanın milli agentliyi OANA-nın əsas məqsədlərinə sadiqdir. 2004-cü ildən OANA-ya üzv qəbul olmuş AzərTAc 2008-ci ildən onun rəhbər orqanının büro üzvüdür. Agentliyimiz OANA-nın saytındakı yenilikləri diqqətlə izləyir, eyni zamanda, özünün inkişaf modelini yaradaraq regionun lider dövlətinə çevrilmiş Azərbaycanın uğurları barədə dünya ictimaiyyətini məlumatlandırmaq işində təşkilatın internet platformasından fəal istifadə edir.
Baş direktor bildirib ki, AzərTAc innovativ yeniliklərin tətbiqinə, tərəfdaşlar arasında informasiya mübadiləsi sahəsində əməkdaşlığın genişləndirilməsinə xüsusi diqqət yetirir. Son illər AzərTAc-da multimedia texnologiyalarından fəal istifadə edilir və bu sahədə yaxşı təcrübəyə nail olunub.
Asiya-Sakit okean regionunun sürətlə inkişaf etdiyini vurğulayan A.Aslanov bütün dünyanın nəzərlərinin bu bölgəyə yönəldiyi və burada baş verən proseslərin diqqətlə izləndiyi bir vaxtda region ölkələrinin dünya siyasətinə təsir dairəsinin daha da genişlənməsi məsələsinin gündəmdə olduğunu və bununla əlaqədar OANA kimi mühüm platformanın əhəmiyyətinin xüsusilə artdığını qeyd etmiş və bu platforma çərçivəsində daha fəal iş aparmağın vacibliyinə toxunub.
Əlbəttə, biz OANA-nın fəaliyyətini daha da yaxşılaşdırmaq üçün yeni yollar axtarmalıyıq, - deyən baş direktor bildirmişdir ki, üzv agentliklər arasında əlaqələrin inkişafı, təcrübə mübadiləsi təşkilat çərçivəsində əməkdaşlığın səmərəliliyini daha da artıra bilər. Bu məsələdə AzərTAc-ın yaxşı təcrübəsi vardır. Ötən illərdə agentliyimizin Malayziyanın Bernama, İndoneziyanın ANTARA, Rusiyanın İTAR-TASS agentlikləri ilə təcrübə mübadiləsi sahəsində çox yaxşı ənənələri yaranıb. Biz bu ənənələri bütün üzv agentliklərlə davam etdirməyə hazırıq.
AzərTAc-ın baş direktoru deyib ki, üzv agentliklərin həyatında baş verən yeniliklərdən operativ məlumat əldə etmək üçün OANA-nın saytında milli informasiya qurumlarının ən son yeniliklərini təqdim edəcək korporativ xəbərlər bloqunun yaradılmasına ehtiyac vardır. Bu bloq vasitəsilə biz agentliklərimizin həyatında baş verən ən son təşkilati və texnoloji yeniliklərdən xəbər tuta bilərik. Bu cür bloqun yaradılması OANA platformasında daha sıx əməkdaşlığa töhfə vermiş olar.
Müzakirələrin sonunda OANA-nın üzvü olan agentliklərin yayım prinsipləri barədə bəyannamə elan edilib. Türkiyənin Anadolu agentliyi tərəfindən hazırlanmış bəyannamənin layihəsində təcavüz, işgəncə və insanların vəhşicəsinə qətlə yetirildiyi səhnələrin işıqlandırılması zamanı agentliklərin əməl etməli olduqları prinsiplər öz əksini tapıb. Bəyannamənin OANA Baş Assambleyasının gələn ilin sentyabrında Moskvada keçiriləcək iclasında qəbul ediləcəyi bildirilib.
Vüqar Ağayev
.jpg)
Bütün xəbərlər Facebook səhifəmizdə
USD
EUR
GBP
RUB