Azərbaycan Respublikasının prezidenti İlham Əliyevin Belarus Respublikasına rəsmi səfəri başa çatıb. Minsk Milli Aeroportunda görüşən Azərbaycan prezidenti İlham Əliyev və Belarus prezidenti Aleksandr Lukaşenko qısa söhbət ediblər.
Prezident Aleksandr Lukaşenko prezident İlham Əliyevin Belarusa rəsmi səfərinin və bu səfər çərçivəsində aparılan danışıqların nəticələrinə toxunaraq deyib: ’’Bu görüşlərin gedişində yeni ideyalar, təşəbbüslər yaranır. Budəfəki səfərin gedişində də belə oldu. Mən çox minnətdaram ki, bu ilin oktyabrında Bakıda bizim nümayəndə heyətimizi, ümumiyyətlə, görüşümüzün gedişində yaranan təklifləri götür-qoy edəcək birgə komissiyanı qəbul etməyə razı oldunuz. Siz dediyiniz kimi, bundan sonra hansı istiqamətdə hərəkət edəcəyimizi birmənalı olaraq müəyyənləşdirərik’’.
Belarus dövlətinin başçısı həmçinin ölkəsinin Azərbaycan ilə ticarət əlaqələrinin maraqların qarşılıqlı təmin olunması əsasında genişləndirilməsini vurğulayaraq bildirib: ’’Biz məmnuniyyətlə Belarusda bütün bərabər imkanlar daxilində Azərbaycan mallarına üstünlük verəcəyik. Biz hər hansı bir güzəşt xahiş etmirik. Əgər bizim ticarət mübadiləsində və sairdə hər hansı bir maneə yoxdursa, fikrimcə, bunun mahiyyəti elə budur’’.
Prezident İlham Əliyev öz növbəsində səfərin nəticələrindən çox məmnun olduğunu qeyd edib: ’’Biz Sizinlə xeyli müddət bir yerdə olduq, çox mühüm məsələləri müzakirə etdik, o cümlədən, ilk növbədə, əlbəttə, ikitərəfli formatda danışıqlar apardıq və gələcək üçün böyük potensial görürük. Əlbəttə, artıq görülən işlər böyük təəssürat oyadır, ona görə ki, qısa müddət ərzində həm əmtəə dövriyyəsində, həm sənaye istehsalında, həm də energetika sahəsində böyük uğurlara nail olmuşuq. Ən başlıcası isə, biznesin və qarşılıqlı səmərəli ticarətin inkişafı üçün yeni yollar müəyyənləşdirmişik’’.
Prezident İlham Əliyev səfər çərçivəsində iqtisadi əməkdaşlığın genişləndirilməsi ilə bağlı aparılan müzakirələrin əhəmiyyətli olduğunu bildirərək vurğulayıb: ’’Bunlar həm Azərbaycanda yeni istehsal sahələri, həm tikinti, həm kənd təsərrüfatı sektorları, həmçinin əczaçılıqla bağlı yeni istiqamətlərdir. Dünən biz bu məsələni müzakirə etdik, məlum oldu ki, potensial var. Yəni, bizim ikitərəfli münasibətlərdə bir çox sahə var ki, hələ işə düşməyib, amma böyük perspektivlərə malikdir. Düşünürəm ki, layihələrin gerçəkləşdirilməsi nadir təcrübədir. Qərarların qəbul edilməsi ilə onların həyata keçirilməsi arasındakı müddət çox azdır. Ən başlıcası isə bütün istiqamətlər üzrə münasibətləri qarşılıqlı inkişaf etdirmək arzusu vardır. Odur ki, mən böyük nikbinliklə, böyük planlarla qayıdıram və Bakıya çatan kimi də bütün bu layihələrin vaxtında və keyfiyyətlə həyata keçirilməsi üçün hökumət üzvlərinə bütün lazımi tapşırıqlar veriləcək’’.
Prezident Aleksandr Lukaşenko Azərbaycanda, Qafqazda ticarət münasibətləri yaratmaq əlbəttə, çox sərfəli olduğunu bildirərək prezident İlham Əliyevdən iki ölkənin birlikdə digər ölkələrin bazarlarına çıxmasını xahiş edib.
Prezident İlham Əliyev Azərbaycanın bu məsələdə çox maraqlı olduğunu vurğulayıb: ’’Ona görə ki, müəyyən müddətdən sonra bizim daxili bazarımız artıq bütünlüklə yerli istehsalla təmin olunacaq. Yəni, biz qarşımıza belə bir vəzifə qoymuşuq və xarici bazarlara çıxış məsələsi əlbəttə, bizim qarşımızda çox kəskin dayanacaq. Əgər bundan sonra da inkişaf etmək istəyiriksə, - təbii ki, biz bunu istəyirik, - gərək ixrac potensialı, ixrac bazarları haqqında düşünək. Bu məsələdə belaruslu istehsalçılarla birgə istehsal elə ixracyönümlü olacaqdır. Mən Sizin Qafqazda Azərbaycan ilə prioritet əməkdaşlıq haqqında qərarınızı alqışlayıram. Bunun üçün bütün imkanlarımız da, münasibətlərimiz də vardır. Bu gün Azərbaycan bütün Qafqaz iqtisadiyyatının təxminən 80 faizi deməkdir. Bu, nəhəng təbii ehtiyatları və böyük potensialı olan ölkədir. Odur ki, biz birlikdə çox işlər görə bilərik. Düşünürəm ki, üçüncü ölkələrin bazarlarına meyil göstərmək məhz əməkdaşlığımızın yeni istiqamətlərindən biri olacaq’’.
Hər iki ölkənin dövlət bayraqlarının dalğalandığı Minsk Milli Aeroportunda Azərbaycan prezidentinin şərəfinə fəxri qarovul dəstəsi düzülüb.
Azərbaycan prezidenti İlham Əliyevi Belarus prezidenti Aleksandr Lukaşenko yola salıb.
Həmin gün prezident İlham Əliyev Bakıya qayıdıb.
Heydər Əliyev Beynəlxalq Aeroportunda prezident İlham Əliyevi baş nazir Artur Rasizadə və Bakı Şəhər İcra Hakimiyyətinin başçısı Hacıbala Abutalıbov qarşılayıblar.
Bütün xəbərlər Facebook səhifəmizdə
USD
EUR
GBP
RUB