USAİD-in maliyyə dəstəyi ilə Kounterpart İnterneşnlın həyata keçirdiyi Qadın İştirakçılığı Proqramı tərəfindən dəstəklənən "Qadınların inkişafı naminə ictimai maraqların qorunması" layihəsi çərçivəsində Masallı şəhərində "Azərbaycan cəmiyyətində qadınların aktiv sosial qrup kimi formalaşması: mövcud vəziyyət və yeni imkanların axtarışı" mövzusunda ictimai dinləmə keçirilib. Fonddan SİA-ya verilən xəbərə görə, tədbirdə Masallı rayon İcra Hakimiyyəti rəsmiləri, Azərbaycan Respublikası Ailə, Qadın və Uşaq Problemləri üzrə Dövlət Komitəsinin, rayon prokurorluğu və məhkəməsinin əməkdaşları, Masallı rayon Məşğulluq Mərkəzinin rəhbərliyi, xanım bələdiyyə sədrləri və üzvləri, məktəb direktorları, müxtəlif dövlət orqanlarında vəzifə tutan qadınlar, həkimlər, yerli QHT və KİV nümayəndələri iştirak ediblər.
Tədbiri giriş sözü ilə "Konstitusiya" Araşdırmalar Fondunun prezidenti Əliməmməd Nuriyev, "Qadınlar Arası Həmrəylik" İB-nin sədri Ruhəngiz Hüseynova, Masallı Rayon İcra Hakimiyyətinin İctimai təşkilatlar və siyasi partiyalarla iş şöbəsinin müdiri Seyfəddin Əliyev açıblar.
R.Hüseynova "Qadınların inkişafı naminə ictimai maraqların qorunması" layihəsi onun məqsədləri, vəzifələri barədə məlumat verib. S.Əliyev isə Masallı rayonunda qadınların ictimai-siyasi həyatda rolu, qadın iştirakçılığının dəstəklənməsi üçün görülən tədbirlərdən danışıb. O bildirib ki, Masallı rayon əhalisinin 49,5 fazini qadınlar təşkil edir, dövlət müəssisələrində çalışanalrın 42%, özəl strukturlar işləyənlərin 35%, kənd təsərrüfatında fiziki şəxs kimi fəaliyyət göstərənlərin 58% qadınlar təşkil edir. 2009-cu ildə keçirilmiş bələdiyyə seçkilərində bələdiyyə üzvü seçilənlərin 21.3 fazini qadınlar təşkil edir. 3 bələdiyyənin sədri isə xanımdır.
Ə.Nuriyev "Azərbaycan cəmiyyətində qadınların aktiv sosial qrup kimi formalaşması: mövcud vəziyyət və yeni imkanların axtarışı" mövzusunda təqdimatla çıxış edib. O, qadın hüquq və azadlıqlarının təsbit olunduğu beynəlxalq sənədlər, konvensiyalar, Azərbaycan Demokratik Respublikası dövründən bu günümüzə qədər qadınların hüquqlarının qorunması, qadın iştirakçılğının dəstəklənməsi, gender bərabərsizliyinin aradan qaldırılması məqsədilə atılan addımlar barədə ətraflı məlumat verib. Ə.Nuriyev həmçinin, BMT-nin Qadınlara münasibətdə ayrıseçkiliyin bütün formalarının ləğv olunması haqqında Konvensiyası (CEDAW), BMT-nin Qadınlara münasibətdə ayrı-seçkiliyin ləğv edilməsi üzrə Komitəsi tərəfindən Konvensiyanın icarsı ilə bağlı Azərbaycana verilən son tövsiyyələr barədə tədbir iştirakçılarını məlumatlandırıb. Eyni zamanda, qadınların aktiv sosial qrup kimi formalaşması məqsədilə Azərbaycan hökumətinin yeni hədəfləri ilə bağlı da bilgi verib. Onun sözlərinə görə, Əgər 1990-cı ildə bütün deputatların 4,3 faizini, 2000-ci ildə 10,7 faizini qadınlar təşkil edirdisə, bu gün ölkə parlamentində qadınların xüsusi çəkisi 16 faizə qədər artıb. Son bələdiyyə seçkilərində bələdiyyə üzvü seçilmiş qadınların sayı isə əvvəlki seçkilərə nisbətən 4,9 dəfə artaraq 4081 nəfərə çatıb və bələdiyyə üzvləri arasında onların xüsusi çəkisi 26,2 faiz olub.
Ailə, Qadın və Uşaq Problemləri üzrə Dövlət Komitəsinin Masallı Rayonu üzrə əlaqələndiricisi Naibə Aslanova "Azərbaycan cəmiyyətində qadınların rolu", Masallı rayon Məşğulluq Mərkəzinin direktoru Yusif Məmmədov isə "Məşğulluq, əməyə cəlb olunma, əmək hüquqlarına münasibət zamanı qadınlara münasibətdə ayrı-seçkiliyin qarşısının alınması" mövzusunda məruzələrlə ilə çıxış ediblər. N.Aslanova bildirib ki, erkən nikahların sayı azalıb. 2011-ci il məzunları içərisində ali məktəbə qəbul olunanların qızların sayının artması bu faktı sübut edir. Belə ki, 2008-ci ildə 215-dən 51 qız idisə, 2011-ci ildə 210-nəfərdən 60-ı qız olub. Y.Məmmədovun verdiyi məlumata görə, 2009-cu ildə qadınların ümumi işlə təmin olunanlar arasında xüsusi çəkisi 137 nəfər (43%), 2011-ci iləd 219 nəfər (53%) olub.
Məruzələrdən sonra müzakirələr zamanı Masallı rayonunda qadınların üzləşdikləri problemlər, çətinliklər, onların həli yolları ətrafında fikir mübadiləsi aparılıb, təkliflər irəli sürülüb.
Bütün xəbərlər Facebook səhifəmizdə
USD
EUR
GBP
RUB